Iehova ena Witness Taudia Idia Vadivadi Neganai

Katolik taudia be dahaka do idia karaia bema Iehova ena Witness tauna ta be edia ruma dekenai ia mai? Vanegai National Catechistic Bureau of the Italian Bishops’ Conference ese buka ta ia halasia, unai buka ia gwau: “Mai manau to mai emu goada ida danu oi hahedinaraia oi ura lasi umui herevahereva be kara dikana ta lasi.”

Tau ta, Foggia, Italy dekenai, ese revareva ta ia siaia Gazzetta del Mezzogiorno niuspepa dekenai, bona ia hahedinaraia Katolik taudia haida ese unai idia abia dae lasi:

“Lau be Iehova ena Witness tauna ta lasi. Lau be Katolik tauna. To dubu ese ena orea taudia dekenai ia atoa taravatu haida lau hoalaia, ia hamaorodia edia iduara dekenai hadibaia hereva ta do idia atoa Iehova ena Witness taudia be edia ruma dekenai idia mai lasi totona. To, unai taudia be Dirava ena Hereva sibona idia mailaia, bona haida idia durua Baibel ena dobu herevadia idia diba namonamo totona. Inai kara lau itaia neganai, guna Italy dekenai kolera gorerena ia vara bona hadibaia hereva idia henia unai gorere reaia totona negana lau laloatao.

“Lauegu lalohadai be, inai kara ia hahedinaraia dubu be ena orea taudia edia ura ia laloa bada lasi, to sibona ena ura hegeregerena taravatu ia karaia. To hari lagani momo lalodiai, lau itaia Katolik taudia danu be ruma ta ruma ta ai idia lao, Iehova ena Witness taudia idia vadivadi henia danu; bona Iehova ena Witness taudia ese idia abidia dae, idia ida idia herevahereva, ta idia dadaraia lasi.”

Iehova ena Witness taudia be taunimanima idia doria lasi edia hereva idia abia dae totona. To, idia hekwarahi Dirava ena Hereva lalonai ia noho helarona, inai nega dikana lalonai idia ia durua gauna, be ma haida dekenai idia hadibaia totona. Ruma ta ruma ta dekenai idia lao, bona dala dekenai idia davaria taudia idia hereva henia dalana amo, Iehova ena Witness taudia ese idia ura kamonai taudia dekenai Dirava ena Basileia ena sivarai namona idia herevalaia.​—⁠Mataio 24:14; Kara 5:42; 17:⁠17.