Basileia Haroro Ripoti

Democratic Republic of Congo ai Matamata Taudia ese Dirava Ena Ladana Idia Hanamoa

LAGANI handred momo gunanai, salamo torea tauna be matamata taudia ia boiria, noho hanaihanai King do idia hanamoa totona, ia gwau: “Ulato bona uhau, buruka taudia, bona natuna maragidia danu . . . , Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho.” (Salamo 148:12, 13) Democratic Republic of Congo amo idia mai ekspiriens haida ese unai hahenamo hereadaena idia hahedinaraia.

• Spesel painia ta ese ia noholaia rumana ena biaguna be Iehova ena Witness taudia edia kara ia ura henia bada. Unai dainai gwaumaoro ia henia Witness taudia be ena natuna kekeni Fifi, iena mauri lagani be 5, ida Baibel idia stadilaia. Lau Egu Bible Sivarai Bukaa ia stadilaia bona ena diba ia bada ia lao ia itaia murinai, ena tamana ese gwaumaoro ia henia hebou totona Kingdom Hall dekenai ia lao diba. Unuseniai, Fifi maragina be Witness taudia edia ane buka amo Basileia anedia ia dibaia. Ia be ane namba 4 ia ura henia bada, ena ladana be “Dirava ese Paradaiso Ia Gwauhamatalaia.”

Dina ta Fifi ena tamana ese Fifi ia abia lao ena dubu dekenai. Idia ibounai idia hoa, badina Fifi ia ura lasi dubu ena ane ia abia. Dahaka dainai? Badina ia laloa ena tamana ena dubu dekenai idia anelaia anedia be ena Baibel stadi lalonai ia dibaia herevadia hegeregerena lasi. Mai gari lasi ida ia ura henia Basileia anena ia abia.

Nega momo ena lalona idia haidaua toho to idia kwalimu lasi murinai, dubu biagua taudia ese ena mauri lagani 5 kekenina, Fifi, be dubu amo idia atoa siri! Ena be idia kara dika henia, to ena tamana ia badu lasi. Ia moale badina Fifi ese ia abidadama henia gaudia dainai ia gini goada. Fifi ena tamana bona sinana idia ura Fifi be Iehova ena Witness taudia do ia bamoa noho.

• Mero matamata ta ladana Lukodi be Iehova ena Witness taudia ida Baibel ia stadilaia matamaia neganai, ena tamana ia badu dikadika. Nega ta Lukodi ia hegaegae Kingdom Hall dekenai hebou totona do ia lao neganai, ena tamana ese kaia badana amo ia hagaria. Ma nega ta Lukodi ena tamana ese au ta amo ia botaia, ena doruna dekenai bero badana ia havaraia. Ena be dagedage badana ia davaria, Lukodi ena ura, Iehova ena Witness tauna ta ai do ia lao urana, ia goada noho. Ia goada ia lao bena bapatiso ia abia. Hari ia be regula painia ta.

Lukodi ena taihuna, Sona, be Lukodi ena haheauka karana ia laloa bada dainai, ia danu be Iehova ena Witness taudia ida Baibel ia stadilaia matamaia. To, ena stadi ia koua totona, edia tamana ese Sona ia siaia hanua ma ta dekenai, Witness taudia idia noho lasi hanuana unai, unuseniai do ia sikuli totona. To, hanaihanai Sona ese ia dibaia gaudia be ma haida dekenai ia herevalaia. Ena kara dainai, ena kasin danu be Baibel ena hereva ia ura henia.

Kahirakahira hanuana dekenai idia noho Witness taudia be Sona ena haroro gaukara ena sivarai idia kamonai neganai, ia idia vadivadi henia bona dala idia karaia hanaihanai Baibel stadi do idia karaia totona. Ia goada ia lao bona nega sisina murinai ena taihuna bamona, ia gwauhamata bona bapatiso Iehova ena Witness kekenina ta ai ia lao. Ma danu, hari iena kasin be bapatiso lasi pablisa ta, bona buka stadi idia karaia unai hanua dekenai.

Matamata taudia be Iehova ena ladana idia hanamoa be moale gauna bona unai ese ita ia hagoadaia danu!

[Footnote]