Dirava ese Tanobada Do Ia Hadikaia Ore, A?

POPE John Paul Iharuana ia gwau, taunimanima be vaira negana namona idia naria diba. Ia gwau matamana amo ema bona hari, “taunimanima be kara dika idia karaia noho, reana edia kara dika be abata ia do vara lasi neganai idia noho taudia edia kara dika idia hanaia.” To, pope ia gwau, “Dirava ese Noa ida ia karaia gwauhamatana ena herevadia amo ita lalo-parara kara dika ta dainai Dirava ese sibona ia havaraia tanobadana do ia hadikaia ore lasi.”

Momokani Dirava be tanobada do ia hadikaia ore lasi, a? Baibel ia gwau Abata murinai Dirava ese Noa ia hamaoroa, ia gwau: “Lau ese abata dekena amo mauri gaudia ibounai do lau alaia lou lasi. Abata ese tanobada do ia hadikaia ore lou lasi.” (Genese 9:11) Pope ia gwau inai hereva amo, Dirava “be mai ena maduna hadikaia gauna amo [tanobada] do ia naria.”

Baibel ia hahedinaraia goevagoeva iseda tanobada ena Havaraia Tauna ese taunimanima do ia koudia, bena tanobada idia hadikaia ore diba lasi. Baibel ia gwau: “Tanobada be ia matamata lasi. Guna ia noho hegeregerena ia noho.” (Hadibaia Tauna 1:⁠4) To Abata amo ma gau ta ita dibaia​—⁠pope ese ia herevalaia lasi gauna.

Iesu ia gwau do ia noho negana lalonai tanobada dekenai idia vara gaudia be “Noa ena nega bamona,” unai neganai taunimanima be “idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao.” (Mataio 24:​37-39) Unai hegeregerena, aposetolo Petero ia gwau “unai tanobada gunana be ranu dekena amo ia hadikaia ore” bamona, hari inai tanobada ia noho ela bona “Kota Badana Dinana dekenai . . . Dirava idia negea taudia be do idia boio.”​—⁠2 Petero 3:​5-7.

Iesu bona Petero be Dirava ese Noa ida ia karaia gwauhamatana idia laloaboio, a? Lasi vaitani! Noa ida ia karaia gwauhamatana lalonai ia hereva hegeregerena, Dirava be abata do ia gaukaralaia lasi inai tanobada ena oromana dikana ia hadikaia ore totona. To, “King ibounai edia King, bona lohia ibounai edia Lohia,” Iesu Keriso, ena siahu do ia gaukaralaia. (Apokalupo 19:​11-21) Unai dainai, Baibel ia gwau tanobada do idia hadikaia ore lasi, to kara dika taudia edia “tanobada” be do ia ore. (Aonega Herevadia 2:​21, 22; Apokalupo 11:18) Unai murinai, “kara maoromaoro taudia ese, Dirava ia henidia tano dekenai do idia noho ela bona hanaihanai.”​—⁠Salamo 37:⁠29.