Basileia Haroro Ripoti

Dirava ese Uhe Ia Hatubua Alaska Dekenai

SINOU bona aisi henunai, uhe maragina ta be tubu negana ia naria noho. Alaska ena siahu negana ena hua kwadogidia toi lalonai kabedi uhena ta ena bada be 3 milimita ia tubu bona ia bada ia lao ela bona ena metau be 40 kilogaram! Oibe, inai tano, guna idia laloa tubutubu gauna ta do ia tubu lasi, aisi sibona ese ia koua tanona, be aniani momo ia havaraia diba.

Unai kara be momokani Alaska ena lauma umana lalonai. Unai, keru negadia be daudau tanona ai, Iehova ena Witness taudia be Basileia uhena idia hadoa noho. Dirava ese kudou namona dekenai uhe ia hatubua, tanobada ena kahana haida dekenai ia vara bamona.​—⁠1 Korinto 3:​6, 7.

● Sikuli basi lalonai idia helai neganai, Witness kekeni matamatana ta ladana Vanessa be ia itaia ia ida ia sikuli hebou stiuden ta, Ann, be nega ibounai sibona ia helai. Ann ena toana be ia lalohisihisi, unai dainai Vanessa ese ia boiria ia badinai do ia helai. Madi, Ann ia lalohisihisi bada ita hoalaia lasi! Ena sinana be kudou gorere amo ia mase, bona daudau lasi murinai, ena tamana be kensa gorere amo ia mase. Unai dainai Ann be Alaska dekenai ena varavara taudia danu ia noho.

Saturday ta ai haroro gaukara lalonai, Vanessa be ia davaria turana matamatana ena noho gabuna dekenai ia lao bona Dirava ese Ita Ia Laloa Eiava? buklet ta ia rakatania ia dekenai. Monday ai sikuli dekenai, Ann ese unai Witness kekenina ia tahua. Ann be mai ena Baibel henanadai momo, bona Vanessa ese ia haerelaidia diba. Ia henanadai: “Emui hebou be edeseniai umui karaia?” Unai adorahi ai Ann be Kingdom Hall dekenai ena hebou ginigunana dekenai ia lao.

Iesu ena gwauhamata hegeregerena, daudau lasi lalonai unai mauri lagani 17 ihareha kekenina ese ‘tama’ bona ‘sina’ momo ia davaria. (Mataio 19:29) Bona “Dirava Ena Maino Gwauraia Taudia” Distrik Hebouhebouna be moale negana, badina Ann be mai moale bona mai kiri ida ranu bapatiso amo ena gwauhamata Iehova dekenai ia hahedinaraia!

● Alaska ena Arctic gabuna badana ena daudau gabudia ai​—⁠hanua ta ta padadiai kilomita handred momo lalonai be tau ta eiava gau ta ia noho lasi​—⁠Watch Tower Society ena ensini rua peleini idia gaukaralaia hanua 150 dekenai Basileia ena uhe idia hadoa totona. To hanaihanai Baibel stadi karana amo lauma dalanai idia tubu totona be revareva amo idia karaia. Momo idia hekwarahi revareva idia torea totona dainai, Baibel ia hadibaia tauna be dala idauidau do ia gaukaralaia ena stiuden tauna ena ura ia habadaia noho totona. Unai be edena bamona idia karaia diba?

Kathy ese Edna ida Baibel stadi namona ia karaia, ena be idia ta ta edia noho gabuna edia padana be kilomita 600 mai kahana! Kathy ese stadi bukana ena henanadai ia torea sibona lasi, to ia ese pepa idauna ai henanadai ia torea bona haere torea gabuna ia atoa danu. Edna ese haere ia toredia murinai, Kathy ese revareva ma ia siaia bona hereva ta ena anina hahedinaraia namonamo totona hereva ma haida ia torea. Kathy ia gwau: “Wednesday adorahi lau atoa siri emai ‘stadi’ karaia totona, bona unai lau badinaia Baibel stadi ma ta lau karaia hegeregerena. Lau ese envelop mai ena adres bona stampa danu lau siaia Edna dekenai. Wiki rua murinai lau siaia revarevana ia abia dainai, revareva amo stadi karaia dalana be ia metairametaira.”

Hua 10 revareva amo idia stadi murinai, Anchorage ena distrik hebouhebouna dekenai idia hedavari neganai, Kathy bona Edna edia moale mani oi laloa! Witness taudia idia moale danu badina Baibel stadi taudia bona kamonai taudia ma haida Alaska ena daudau hanuadia amo idia mai.

Ena be nega haida tubu dalana be ia metairametaira, “uhe” haida be hereva momokani ena diari ese ia botaia neganai idia tubu haragaharaga. Alaska dekenai lagani ta ta ai bapatiso idia abia Iehova idia hanamoa taudia matamatadia edia averes be 100 mai kahana! Ita gwau, “Tanikiu, Iehova,” badina oi ese uhe oi hatubua!