“Ima Kwakikwaki Tamona Baibel”

DINA ena siahu ese Joseph Schereschewsky ena tauanina ia hadikaia murinai, ia be taipraita sibona amo ia toretore diba, bona ena ima kwakikwaki tamona sibona ia gaukaralaia diba. To ia ura gauna ia hagugurua​—Baibel ia hahanaia China gado ai, idau tano tauna ia dibaia gado aukana ta.

Schereschewsky be Iuda tauna, to ia bada neganai Keristani tomadihona ia stadilaia bona ia abia dae. Gabeai, China dekenai misinari gaukara ia karaia. Unuseniai, ia be gado hahanaia gaukara momo lalonai ia gaukara, lagani 1866 ai unai gaukara ia hamatamaia ela bona lagani 1900 ena murina lagani ginigunadia. Schereschewsky be Iuda tauna dainai, ena diba Heberu gado dekenai ese ena gaukara turadia edia diba ia hanaia. Unai dainai, Heberu Revarevadia hahanaia gaukarana be ia dekenai idia henia. Lagani momo ia karaia gaukarana ena dokona kahana ai, ia ese China gado ai Baibel ibounai mai ena hahegeregerea siridia ia hahanaia.

Joseph Schereschewsky be Baibel hahanaia tauna dainai, mai ena goada ida taunimanima momo idia diba gadodia ai Baibel idia hahanaia gaukarana ia durua. To ena gaukara be auka. The Book of a Thousand Tongues ia gwau, China gado Baibel totona Schereschewsky ia hekwarahi bada, “badina ena gaukara be bada bona hekwakwanai momo lalonai ia karaia.”

Schereschewsky ena imana idia mase murinai, ia do gaukara goadagoada noho. Ena imana ia gaukaralaidia namonamo diba lasi dainai, taipraita ia gaukaralaia be auka. Unai dainai ia gwau ia hahanaia gauna be ena ima kwakikwaki tamona Baibel. Ena be hekwakwanai momo ia davaria, to ia ura unai gaukara ia haorea dainai, Schereschewsky be lagani 25 ia hekwarahi. Ena gaukara ia hadokoa lasi dainai, taunimanima ese China gado dekenai Dirava ena Hereva idia lalo-pararalaia diba gaukarana ia durua. Unai gado ai idia hereva taudia edia namba ese ma gado ta ai idia hereva taudia edia namba ia hanaia.

[Picture Credit Line on page 11]

Both images: Courtesy of American Bible Society Archives