“Oi be Mero Maragi Neganai, Buka Helagadia Dekenai Oi Manada Momokani”

VANEGAI saiens taudia idia karaia stadi lalodiai idia davaria, beibi hereva henidia karana ese beibi edia kwara harana ena tubu dalana ia habadaia, unai amo idia laloa namonamo, gau haida do idia lalohadailaia, bona hekwakwanai do idia hanamoa diba. Unai be momokani beibi ena mauri lagani ginigunana lalonai. International Herald Tribune ia gwau tahua gaukara idia karaia taudia haida be hari idia abia dae “dina ta ta ai beibi ia kamonai herevadia be mai anina bada gauna gabeai ena aonega, bona sikuli dekenai ena kwalimu totona bona ia hegeregere taunimanima ia bamoa.”

To, namona be ia kamonai herevadia be taunimanima ta amo ia mai. Toana be televisen eiava reidio be hegeregere lasi.

University of Seattle Washington, U.S.A. dekenai, neuroscience hahinena ta ia gwau: “Hari ai diba ta ia maragi negana ai kwara harana varovarodia idia hakapua bona beibi ena kwara harana be diba ia naria noho inai hakapua daladia ia abia hidi totona. Guna ai diba lasi ela bona vanegai sibona ai itaia beibi ia maragi momokani neganai unai ia matamaia. Hegeregere, beibi ia vara bona hua 6 murinai, ia ese ena gado ena regena ia diba vadaeni.”

Taunimanima momo idia gwau beibi edia diba do ia bada ia lao bema ita lalokau henidia bada sibona, to diba tahua taudia ese unai idia abia dae lasi. Idia hahedinaraia danu natuna ia tubu namonamo totona tama sina be mai anina bada.

Unai hereva dainai aposetolo Paulo ena revareva helagana Timoteo dekenai ita laloa, ia gwau: “Oi be maragi neganai, Buka Helagadia dekenai oi manada momokani. Inai Buka Helagadia ese oi dekenai aonega idia henia noho diba, ela bona hamauria do oi davaria.” Timoteo ena sinana bona tubuna hahine mai edia abidadama ese Timoteo ia maragi negana amo reana ia dekenai idia hadibaia revareva helagadia edia anina bada dainai, Dirava ena hesiai tauna namona ai ia lao.​—2 Timoteo 1:5; 3:⁠15.