Basileia Haroro Ripoti
Nega Namodia Ibounai Idia Gaukaralaia
TANOBADA hegegemadai taunimanima idia diba Iehova ena Witness taudia ese Baibel hadibaia gaukarana idia karaia. To idia ese taunimanima durua program ma haida idia karaia danu. Taunimanima ese unai heduru henia karana idia moalelaia bada, Ecuador amo idia mai ekspiriens ese idia hahedinaraia hegeregerena.
◻ Galasi faktori badana ena biagudia idia ura edia gaukara taudia totona, famili taudia naria karadia ia herevalaia kosina ta do idia karaia. Gaukara taudia edia namo ia naria dairekta ese Katolik pris taudia momo ia boiria, unai kosi lalonai idia hereva totona, to idia haere lasi. Pris tauna ta ese ia hamaoroa, pris momo idia hegeregere lasi unai gauna idia herevalaia, bona reana idia ta be do ia mai lasi. Witness taihu ta be unuseniai ia gaukara bona unai ia kamonai neganai, nega momo bisinesi teritori ai ia haroro tadikakana ta ida dala ia hegaegaelaia, faktori do ia vadivadi henia totona.
Kerukeru, unai Witness tauna ese gaukara taudia edia namo ia naria dairekta dekenai ia lao bona stadi kosi ta ia herevalaia. Ia ese Watch Tower Society ena buka bona magasin amo hereva haida edia lista ia karaia. Dairekta ia hoa bada. Ia ese do idia herevalaia gaudia toi ia abia hidi—taunimanima edia turana karana, kara maoromaoro gaukara gabuna ai, bona kara maoromaoro famili lalonai. Bena dala idia hegaegaelaia, unai gaudia be gaukara taudia ibounai dekenai ia herevalaia totona.
Gaukara taudia be grup 7 idia karaia bona ta ta lalonai taunimanima 30 idia noho, bona unai murinai lo tadikaka toi ese idia hereva henidia. Unai amo dahaka ia vara? Gaukara taudia momo idia noinoi ta be edia ruma dekenai do ia vadivadi henidia, bona Baibel stadi durua bukadia 216 idia hariharilaia. Faktori gunalaia taudia ese unai idia ura henia bada dainai, idia noinoi Witness taudia ese hereva ma haida do idia hegaegaelaia totona.
◻ Vanegai, Ecuador ena gavamani ese taravatu ia karaia, ia gwau sikuli dekenai tomadiho karadia idia hadibaia diba. Misinari taihu ta ese komiuniti sikuli ia naria hahinena ia vadivadi henia bona ia nanadaia unai taravatu ena hereva hegeregerena dahaka idia karaia noho. Sikuli naria hahinena ia gwau idia ese Maria tomadiho henia karana ena program ta idia hamatamaia toho, to idia karaia lasi. Taihu ia gwau unai bamona tomadiho karana ese Katolik lasi natudia dekenai hekwakwanai ia havaraia diba, bona sikuli naria hahine ese ena hereva ia abia dae. Misinari taihuna ia gwau: “To, ai be mai emai program ta, Baibel amo kara maoromaoro taravatudia ai hadibaia totona, bona ia ese tomadiho dalana ta dekenai natudia ia veria lasi.” Sikuli naria hahine ia gwau: “Edena negai do oi mai diba? Kerukeru murina dinana ia hegeregere, a?” Misinari taihuna ese ia dekenai Hadibaia Tauna Badana Ita Kamonai Henia bukana ia hahedinaraia murinai, idia ese karoa ladana “Maino Havaraia Taudia Idia Moale” idia abia hidi do idia herevalaia totona.
Misinari taihu ia giroa neganai, hora toi lalonai sikuli daiutu 7 ia vadivadi henidia bona unai sikuli naria hahine be ia kamonai noho. Greid 5 taudia ia hereva henia murinai, stiuden ta ia gwau: “Mani emu kara, greid 6 oi vadivadi danu. Hanaihanai ai idia dadabaia badina idia ura heatu!” Tisa ta ia gwau: “Dagedage karana ita herevalaia be gau badana. Namona be nega do ita atoa unai ita herevalaia totona.”
Dala idia hegaegaelaia sikuli dekenai do ia giroa lou, kamonai karana bona koikoi karana do idia herevalaia totona. Ema bona hari, unai kara amo anina namona ia vara. Hari unai misinari taihu be dala dekenai ia raka neganai, natudia be ia dekenai idia heau lao, ia ida idia hedavari bona Baibel henanadai idia henia totona. Ma haida be mai edia moale ida edia tama sina dekenai ia idia hahedinaraia. Ma danu, unai sikuli natudia rua ida Baibel stadi ia hamatamaia vadaeni.