Oiemu Hereva be ta Ia Gwadaia o Ia Hanamoa?

INAI nega aukadia lalonai, momo be idia “lalohisihisi” bona idia daradoko be hoa gauna lasi. (Salamo 34:18) Unai dainai, aposetolo Paulo ia gwau, hanaihanai lalo-metau taudia ‘do ita hagoadaia’ bona ‘manoka taudia do ita durua’ be namo. (1 Tesalonika 5:14) To edena bamona bema badibadina tauna ta ese iseda lalona ia hahisia o kerere badana ta ia karaia? Unai bamona hekwakwanai lalonai, reana ita laloa unai tauna do ita sisiba henia auka be maoro. To, namona be ita naria namonamo. Ena be sisiba ita henia be maoro, bema mai badu danu ita henia, dika do ia havaraia diba. Aonega Herevadia 12:18 ia gwau: “Ia hereva haraga tauna ena hereva, be tuari kaia ia gwadaia noho bamona.”

Unai dainai, ita ura sisiba ita henia gwauraia o hekwakwanai ta ita hamaoromaoroa gwauraia neganai, Aonega Herevadia 12:18 ena kahana iharuana do ita laloatao be mai anina bada, ia gwau: “Aonega tauna ena hereva ese, taunimanima idia hamauria diba.” Nega ibounai oi sibona oi nanadaia, ‘Bema ta ese lau do ia sisiba henia be namo, lau ura edena bamona lau do ia kara henia.’ Ita momo be hagoadaia herevana ita abia dae be auka lasi, to gwau henia herevana ita abia dae be auka. Unai dainai haida hanamoa karana do oi karaia badabada. Unai ese oi ia hahisia tauna do ia hamarerea ena kara ia hanamoa totona, bona ia ese mai moale ida oi henia heduru do ia abia dae.

Hanaihanai iseda hereva be mai manau ida ita gwauraia be mai anina bada! Hanamoa herevadia dainai kamonai tauna ena hemami be salamo torea tauna ena hemami bamona, ia gwau: “Tau namona ese, iena bogahisihisi dekena amo, lau do ia dadabaia, o lau dekenai do ia gwau henia, be namo.”​—⁠Salamo 141:⁠5.