“Umui Abia Gauna Umui Dogoatao Noho”

Greece ai, Cyclades Islands ena motumotu iboudiai be 30 bamona, bona idia ta dekenai Witness taudia haida idia haroro. Idia rua be dala ta dekenai ruma ta ruma ta gaukarana idia karaia neganai, pulisi tauna ta idia davaria bona ia ese idia ia hamaoroa namona be ia idia badinaia bona pulisi steiseni dekenai idia lao. Pulisi steiseni ai idia ginidae bena nega sisina murinai, telefon ia tai. Ia be hanua ena pris tauna. Ia gwau: “Lau kamonai Iehova ena Witness taudia haida be hanua dekenai idia noho.” Pulisi tauna ia gwau: “Oibe, rua be idia noho inai.” Pris tauna ia gwau: “Do lau mai.” Edia herevahereva ena regena dainai, tadikaka be idia gari sisina.

To, ia ginidae neganai, pris tauna ia kiri, edia imana ia abia, bona pulisi tauna badinai ia noho sea dekenai ia helai. Idia herevahereva neganai, pulisi tauna be ia badu ia lao sisina to pris tauna be mai hemataurai ida hereva namodia ia gwauraia. Pulisi tauna ia hamaoroa Witness taudia do ia hadikaia lasi, bona ia gwau: “Henanadai idauidau idia haerelaia diba badina Tiokratik Hesiai Sikuli dekenai diba idia abia. Tanobada oi hadikaia be ia auka lasi, to Iehova ena Witness tauna ta ena abidadama oi haidaua be ia auka.”

Unai dina murinai, idia haroro noho lalonai, unai tadikaka ese pris tauna idia davaria lou bona idia nanadaia: “Dahaka dainai pulisi steiseni dekenai ita herevahereva neganai, ai oi kara namo henia?” Pris tauna ia hamaorodia Syros dekenai idia noho Witness taudia momo ia diba, bona lagani momo lalonai ia ese Gima Kohorona bona Awake! magasin ia duahia. Momokani, nega momo ia ese Gima Kohorona magasin ia abia, buka ta lalonai ia hunia, bona dubu dekenai ia gaukaralaia ena haroro hereva ia henia totona. Ia gwau: “Lau laloa mauri be anina lasi bema emui buka bona magasin lau duahia lasi. Idia ese lau dekenai helaro idia henia.”

Gabeai, pris tauna be Witness taudia ia hamaoroa: “Namona be umui dekenai gau ta lau gwauraia. Umui abia gauna umui dogoatao noho. Umui rakatania be kerere. Hari lau gwauraia herevana be egu hereva hereadaena, bona egu uduna amo lau gwauraia sibona lasi; to egu kudouna ibounai amo lau gwauraia.”