Baibel Matamatana Hari Inai Nega Ena Greek Gado Ai

AUGUST 23, 1997, be dina badana Greece ai, “Dirava Ena Hereva Abidadama Henia” Distrik Hebouhebou dekenai idia lao taudia dekenai. Adorahi kahana ia ore gwauraia neganai, Baibel matamatana​—New World Translation of the Holy Scriptures hari inai nega ena Greek gado ai​—idia halasia. Hebou lao taudia idia hoa bona maoromaoro mai moale ida idia tai, idia gini toreisi bona nega sisina daudau lalonai, edia imana idia patapataia!

Lagani 1905 ema bona hari, Iehova ena Witness taudia be Greek Orthodox pris tauna ta ese lagani 100 mai kahana gunanai ia hahanaia Baibel idia gaukaralaia. Unai Baibel be lagani momo lalonai idia gaukaralaia namonamo. To, nega sisina daudau lalonai Iehova ena Witness taudia be Baibel matamatana, ena hereva be maoro bona ena anina lalo-pararalaia haraga gauna, idia ura idia abia. Lagani 1993 ai, idia moale badina Greek gado ai New World Translation of the Christian Greek Scriptures idia abia. To, hari idia moale dikadika badina hari inai nega ena Greek gado ai Baibel ibounai idia abia.

Witness hahinena ta be New World Translation ia herevalaia neganai, ia gwau ia be “ane bamona, lai manadana ese Iehova ena gadona ia abia lao bamona, bona inai be nega ginigunana ai sibona emai gado dekenai ai lalo-pararalaia namonamo diba.” Haida be edia ruma dekenai idia ginidae neganai, maoromaoro edia Baibel matamatana idia duahia matamaia. Hebouhebou dekenai ia lao tauna ta be ena Baibel ia atoa diho lasi ela bona daba 1 okaloka, Iobu ena buka ibounai ia duahia ore murinai.

Lagani 7 lalonai idia gaukara goadagoada unai New World Translation of the Holy Scriptures Greek gado ai idia halasia totona. Idia abia revarevana ta ia gwau: “Namona be umui diba, kudou maoro taudia be Iehova idia dibaia totona ai hadibaia neganai, inai New World Translation ese ai do ia durua bada.”