Basileia Haroro Ripoti

Guna Ia Dagedage Tauna ese Hereva Momokani Ia Dibaia

LIBERIA taudia idia tuari heheni karana be niusi dekenai idia herevalaia momo. Taunimanima tausen momo idia mase bona momo herea be edia hanua idia heautania. Ena be unai nega dikana ia vara, henunai ekspiriens ese ia hahedinaraia hegeregerena, kudou maoro taudia be hereva momokani idia abia dae noho.

Ena mauri lagani be 10 negana amo, James be Lutheran Dubu dekenai idia hadibaia. Dubu ena niuspepa ena edita tauna ai ia lao neganai, ia ese iena dagi ia gaukaralaia Iehova ena Witness taudia hadikaia herevadia ia torea totona. Unai ia karaia ena be ia ese Witness tauna ta ia do hedavari henia lasi.

Gabeai, James be dubu ena niuspepa gaukara ia rakatania bona hotel haheaua bisinesi tauna ai ia lao. Dina ta iena hotel lalonai vaira kahana ena opesi dekenai ia helai noho neganai, dabua namodia idia hahedokilaia taihu rua ese ia dekenai idia lao. Edia dabua namodia ia itaia neganai, ia boiridia vareai. To ia idia vadivadi henia ena badina idia gwauraia hedinarai neganai, ia gwau, “Lau bisi bada herea dainai do ita herevahereva lasi.” Witness taihu rua ese ia dekenai Gima Kohorona bona Awake! sabskripsen idia hariharilaia, bona ia abia, badina ia ura do idia lao haraga. Hua 12 lalonai magasin be iena ruma dekenai idia lao, kumia pepana amo ia kokidia lasi to plastik baege lalonai ia udaia.

Tuari ia bada noho dainai, James ese ena moni bona dava bada kohu haida be baege ta lalonai ia atoa hegaegae, ena gabu do idia hadikaia gwauraia neganai do ia heau haraga totona. Daba ta ai iena murina iduara murimurina ai grenade ta ia pou, karaharaga mai gari ida iena baege ia abia bona ia mauri totona ia heau. Edia hanua idia heautania taudia tausen momo ida, ia be tuari taudia ese idia naria sekea gabudia ia hanaia. Unuseniai, nega momo kerere lasi hanua taudia edia kohu idia henaoa bona idia hamasedia kava.

Sekea gabuna ginigunana dekenai, henanadai haida idia henia James dekenai bona idia hamaoroa ena baege do ia kehoa. Ia kehoa neganai, ena baege lalonai ia itaia bona ia hoa bada herea. Mai lalohisihisi ida ia itaia ia abia baege be iena dava bada kohudia ia udaia baegena lasi. Mai gari ida karaharaga ia heau dainai, ia ese ia kehoa lasi Gima Kohorona bona Awake! magasin ia udaia baegena ia abia. To, tuari tauna ese magasin ia itadia bona iena ladana be kumia pepana dekenai ia duahia neganai, ia gwau: “O, oi be Iehova ena Witness tauna ta. Ai be umui ai tahua lasi, ai diba umui koikoi diba lasi.” Tuari tauna ese baege amo magasin haida ia kokia murinai, James ia hamaoroa ia lao diba.

Sekea gabudia idauidau 9 dekenai unai bamona ia vara, tuari biagudia ibounai idia laloa James be Iehova ena Witness tauna bona dala idia kehoa do ia hanaia bona idia hadikaia lasi. James ia moale iena dava bada kohudia ena baege ia mailaia lasi, badina ia itaia vadaeni gaudia amo ia diba iena kohu dainai ia idia alaia diba.

Dokonai sekea gabuna ginigabena, momo ese idia garilaia bada gabuna dekenai ia ginidae neganai, tano dekenai mase tauanina momo ia itaia bona ia gari bada herea. Ia gari bada dainai, ia ese Iehova ena ladana dekenai heduru ia noia. Ia guriguri bema Dirava ese inai mase gabuna amo ia durua, ena mauri dinadia ibounai lalonai iena hesiai gaukara do ia karaia.

James ese tuari taudia dekenai iena baege ia henia, bona idia hereva lou: “Ai be inai taudia ai tahua lasi.” Bona ia dekenai idia gwau: “Oiemu tadikaka ta ena noho gabuna be inai ororo badinai. Oi lao bona ia ida oi noho.” James ena lalohadai Iehova ena Witness taudia dekenai be ia idau momokani vadaeni. Maoromaoro, unai tadikaka dekenai ia lao bona dala idia hegaegaelaia Mauri Hanaihanaia bukana do idia stadilaia.

Dina haida murinai, unai gabu idia hadikaia dainai ia heau oho. Unai neganai, James be iena Mauri Hanaihanai bukana sibona ia dogoatao bona uda dekenai ia heau lao. Hua 11 ai, Witness taudia ta ia davaria lasi neganai, ia ese ena buka be nega ima ia stadilaia. Siti dekenai ia giroa lou diba neganai, Witness taudia ida iena Baibel stadi ia hamatamaia lou bona lauma dalanai ia goada ia lao haraga. Daudau lasi murinai, ia bapatiso bona hari ia be mai kamonai ida iena lauma tadikaka danu ia gaukara noho.

[Footnote]