“Umui be Dirava Ia Ura Ita Kara Dalana ai Umui Kara”
KERISTANI taudia be “Lohiabada dainai” gavamani taudia ida idia gaukara hebou namonamo neganai, idia diba ma haida ese do idia hanamodia. (1 Petero 2:13-15) Iehova ena Witness taudia South Africa dekenai edia distrik hebouhebou be kolesi ta ena hebou rumana dekenai idia karaia neganai, unai bamona idia davaria.
Hebouhebou ena dina ginigunana ai, kolesi ena sekuriti taudia idia hegaegae badina idia laloa hebou lao taudia do idia badu momo bona idia ida do idia gaukara namonamo lasi, guna hebouhebou haida dekenai idia davaria taudia bamona. To, idia be guna Iehova ena Witness taudia ida idia gaukara lasi, unai dainai do idia hoa bada herea!
Sekuriti pulisi ese hanaihanai geiti dekenai sekuriti sekea gaukara idia karaia hegeregerena, idia vareai bona idia raka lasi motuka ibounai idia sekea. Idia hoa badina motuka taudia ese mai moale, haheauka, bona hemataurai ida idia hanamodia, ena be unai sekea gaukara ese edia nega ia haorea. Nega momo idia davaria dagedage, hepapahuahu, bona hereva dikadia be lasi. Sekuriti ofesa ta ia gwau: “Umui be vadivadi taudia ma haida hegeregeredia lasi, ai ibounai ai itaia diba umui be manau bona hemataurai umui hahedinaraia.”
Sekuriti taudia edia ofesa badana ese Iehova ena Witness taudia edia gaukara namonamo karana ena sivarai ia kamonai neganai, ia gwau motuka idia sekea be anina lasi. Ia gwau: “Badina umui be kara namo umui badinaia taudia.” Unai dainai, motuka mai edia “JW” stika idia vareai sibona, idia sekedia lasi.
Hebouhebou ena dokona dekenai, sekuriti taudia edia ofesa badana ia gwau ena helaro be nega sisina murina ai Witness taudia be unuseniai do idia mai idia hebou lou totona. Ia gwau: “Ai ese inai bamona kara namo taudia be guna ai itaia lasi. Umui be Dirava ia ura ita kara dalana ai umui kara.” Unai bamona hanamoa hereva ese Keristani taudia momokanidia ia durua ‘kara namodia do idia karaia noho’ totona, unai amo taunimanima ese ‘unai kara namodia idia itaia neganai, idia ese Dirava do idia hanamoa.’—1 Petero 2:12.