Basileia Haroro Ripoti

Ruma Bese Ena Mauri Namona ese Ma Haida be Dirava Dekenai Ia Veria Lao

IEHOVA ese aonega bona lalo-parara bada amo Iosepa ia hanamoa. (Kara 7:10) Bena, Iosepa ena lalo-parara dainai ‘Farao mai ena durua taudia ese ena hereva idia abia dae.’​—⁠Genese 41:⁠37.

Unai hegeregerena hari inai negai, Iehova ese edia Baibel stadi karana amo ena taunimanima dekenai lalo-parara ia henia. (2 Timoteo 3:​16, 17) Unai aonega bona lalo-parara ese huahua namona ia havaraia bema Baibel ena sisiba idia badinaia. Edia kara namo be nega momo ‘idia itaia taudia ese idia abia dae,’ inai ekspiriens Zimbabwe amo ese idia hahedinaraia bamona.

• Hahine ta ena dekena taudia be Iehova ena Witnes taudia. Ena be Witnes taudia ia ura henia lasi, edia kara ia ura henia, edia ruma bese maurina ia ura henia bada. Ia itaia unai tau bona ena adavana edia hetura karana be namo herea, bona edia natudia be kamonai natudia. Ia itaia gauna badana be tau ese ena adavana ia lalokau henia momokani.

Africa ai idia abia dae herevana ta be bema tau ese ena adavana ia lalokau henia, hahine ese meamea karana amo ena tau ia “hamanadaia.” Unai dainai unai hahine be Witnes hahinena dekenai ia lao bona ia nanadaia: “Ia hegeregere, emu adavana dekenai oi henia meamea gauna be lau oi henia bena lauegu adavana danu be lau do ia lalokau henia oiemu adavana ese oi ia lalokau henia hegeregerena, a?” Witnes hahinena ia haere: “Io, ia namo, kerukeru adorahi do lau abia mai.”

Murina dinana ai, taihu be ena “meamea” gauna ia abia lao ena dekena hahinena dekenai. Unai be dahaka? Unai be Baibel, bona Diba ese Mauri Dekenai Ita Ia Hakaua Lao bukana. Diba bukana amo inai hereva “Dirava Ia Hanamoa Besena Haginia Dalana” ia herevalaia murinai, taihu be unai hahine dekenai ia gwau: “Inai be lau bona egu adavana ese ai gaukaralaia ‘meamea’ gauna, ta ta ai ‘hamanadaia’ heheni totona, bona unai dainai ai lalokau heheni bada.” Baibel stadi idia hamatamaia, bona unai hahine ia goada haraga bena iena gwauhamata Iehova dekenai be ranu bapatiso amo ia hahedinaraia.

• Zimbabwe bona Mozambique edia not ist hetoana kahirakahira ai ia noho kongregesen maragina ta dekenai idia siaia spesel painia rua be pura rua lalonai ruma-ta-ruma-ta haroro gaukarana idia karaia lasi. Dahaka dainai? Badina taunimanima be idia dekenai idia mai idia ese do idia herevalaia gauna idia kamonai totona. Painia ta ese unai ia vara dalana ia herevalaia: “Ai be kilomita 15 ai laolao, kamonai tauna ta ida pura ta ta ena Baibel stadi ai karaia totona. Ai hekwarahi unai gabu dekenai ai ginidae totona. Ai be kopukopu dekenai ai raka, bona abata bada sinavaidia, idia daekau mai aiemai aiona dekenai, ai hanaia. Unai ena anina be emai dabua bona tamaka be emai kwarana dekenai ai atoa, dala ai tahua sinavai ai hanaia, bona sinavai ena kahana dekenai emai dabua ai karaia.

“Kamonai tauna ena dekena taudia be emai lalo-goada karana dainai idia hoa. Unai idia itaia taudia huanai ta be unai gabu ena tomadiho oreana ena gunalaia tauna. Ena murinai idia raka taudia dekenai ia gwau: ‘Unai Iehova ena Witnes tau matamata rua edia lalo-goada bamona umui ura karaia, a?’ Murina dinana ai, iena murinai idia raka taudia momo idia mai aiemai ruma dekenai, idia ura diba dahaka dainai ai gaukara goada noho. Danu, murina pura rua lalodiai, aiemai vadivadi taudia be momo dainai ai be nega lasi sibona emai aniani ai hegaegaelaia totona!”

Unai pura rua lalonai painia taudia edia ruma ia vadivadi henia tauna ta be unai tomadiho gunalaia tauna. Ia ese Baibel stadi ia abia dae neganai unai painia taudia edia moale mani oi laloa!