Ia Badinaia Hakaua Herevana Dainai Ia Mase
“AUGUST Dickmann (lagani 1910 ai ia vara), Iehova ena Witnes tauna ta, ai laloa.” Unai be vanegai Sachsenhausen ena dibura kamepa gunana dekenai idia hahedinaraia ta laloatao toretorena (ena laulau ia noho) ena hamatamaia herevana. Dahaka dainai Iehova ena Witnes tauna ta dekenai unai bamona laloatao toretorena idia haginia be maoro? Unai toretore ena hereva orena ia gwau: “September 15, 1939 ai, SS taudia ese taunimanima edia vairana ai [ia] idia pidia mase, badina be ena lalona ena mamina ia badinaia dainai.”
Lagani 1937 ai, August Dickmann be Sachsenhausen ena dibura kamepa dekenai idia atoa. Lagani 1939 ai, Tanobada Ibounai Tuarina Iharuana ia matamaia bena dina toi murinai, oda idia henia ami ai ia vareai gwauhamata pepana ia sainia totona. Unai ia dadaraia neganai, kamepa ena biaguna be Heinrich Himmler, SS (Schutzstaffel, Hitler ena gima oreana mai goadana) ia naria tauna ia hadibaia, bona gwaumaoro ia noia, kamepa ai idia noho dibura taudia ibounai vairanai, Dickmann ia hamasea totona. September 17, 1939 ai, The New York Times niuspepa be Germany amo ia gwau: “August Dickmann, mauri lagani 29 tauna, . . . be taunimanima pidia oreana ese inai gabu dekenai idia pidia mase.” Unai niuspepa ia gwau, ia be ena lalona ena mamina dainai tuari karana amo ia gini siri German tauna ginigunana.
Lagani 60 murinai, September 18, 1999 ai, Brandenburg Memorial Foundation Oreana ese Dickmann ena mase laloatao totona kara ta ia karaia, bona hari iena mase dainai idia atoa herahera gauna mai toretore ese vadivadi taudia dekenai iena gari lasi bona abidadama goada karana ia hadibaia. Herahera gauna iharuana mai ena toretore be unai dibura kamepa gunana ena murimuri haba ai idia atoa, bona vadivadi taudia ia hadibaia, Sachsenhausen dekenai edia abidadama dainai hisihisi bada idia ania Iehova ena Witnes taudia be 900 bamona bona Dickmann be idia ta sibona. Ma momo herea be kamepa idaudia dekenai hisihisi idia ania. Oibe, herevana dibura kamepa dekenai hisihisi bada idia ania, to momo herea be Dirava ena hakaua herevadia idia badinaia noho.
Iehova ena Witnes taudia idia laloa, Keristani taudia ese “gavamani do idia kamonai henia” be edia maduna. (Roma 13:1) To, bema gavamani taudia ese idia doria Dirava ena taravatu idia utua totona, idia be Keriso ena aposetolo taudia edia haheitalai idia tohotohoa, idia gwau: “Dirava ai kamonai henia be namo, taunimanima ai kamonai henia be dika.” (Kara 5:29) Unai badina dainai, tanobada dekenai, ena be bese momo idia heai bona idia inai heheni dainai hisihisi idauidau idia vara, to gabu ibounai, August Dickmann bamona, Iehova ena Witnes taudia be maino idia tahua. Idia be Baibel ena sisiba idia badinaia, ia gwau: “Namo lasi dika ese umui do ia halusia, to umui ese kara namo dekena amo dika do umui halusia.”—Roma 12:21.