‘Iehova e, Oiemu Boubou Patana Lau Raka Hagegea Noho’

‘IEHOVA e, egu imana lau huria noho, egu maoromaoro bona kerere lasi do lau hahedinaraia totona, bona oiemu boubou patana lau raka hagegea noho.’ (Salamo 26:⁠6) Unai hereva amo idaunegai King Davida ese ena tomadiho karana Iehova dekenai ia gwauraia. To, dahaka dainai Iehova ena boubou patana ia “raka hagegea,” bona edena dala ai?

Davida dekenai Iehova tomadiho henia gabuna be palai rumana mai ena kopa amo idia karaia boubou patana, bona ena lohia negana lalonai unai tomadiho gabuna be Ierusalema ena not kahana, Gibeona, dekenai ia noho. (1 King Taudia 3:⁠4) Unai boubou patana ena bada be sikoea mita 2.2 sibona, Solomona ena dubu ena ariara dekenai gabeai do idia haginia boubou patana mai hairaina ese ena bada do ia hanaia.a To, palai dubuna mai ena boubou patana dekenai Davida ia moale bada, Israela dekenai unai be tomadiho goevana mai anina bada gabuna.​​—⁠Salamo 26:⁠8.

Idia gabua ore bouboudia, maino karaia bouboudia, bona kerere ena davana karaia bouboudia be boubou patana dekenai idia karaia bona lagani ta ta ai Kara Dika ena Davana Karaia Dinana ai bese ibounai totona boubou gaudia idia karaia. Hari Keristani taudia dekenai, unai boubou patana bona ena boubou gaudia be mai ena anina. Aposetolo Paulo ese ia hahedinaraia unai boubou patana ese Dirava ena ura ia laulaulaia, bona unai ura hegeregerena boubou gauna ia abia dae taunimanima be kara dika amo ia ruhaia totona. Paulo ia gwau: “Iesu Keriso ese Dirava ena ‘ura’ ia karaia dainai, ita ibounai kara dika dekena amo ita be goevagoeva vadaeni. Keriso ese inai bamona ia karaia, iena tauanina nega tamona sibona boubou gauna ia halaoa neganai.”​​—⁠Heberu 10:​5-​10.

Boubou patana dekenai gaukara idia karaia gwauraia neganai, hahelaga taudia be vaia edia imana be ranu dekenai idia huria, sibodia idia hagoevaia totona. Unai dainai ia maoro, King Davida be ‘boubou patana ia do raka hagegea’ lasi neganai, ena imana ia huria ena “maoromaoro bona kerere lasi” ia hahedinaraia totona. Davida be “mai maoromaoro bona momokani” ida ia kara. (1 King Taudia 9:⁠4) Bema ena imana be unai dala ai ia huria lasi, ena tomadiho karana​​—⁠‘boubou patana ia raka hagegea’ karana​​—⁠be anina lasi. Momokani, Davida be Levi tauna lasi bona boubou patana dekenai hahelaga gaukarana ia karaia diba lasi. Herevana ia be king, to palai dubu ena ariara dekenai ia vareai diba lasi. To, abidadama Israela tauna ta hegeregerena, Mose ena Taravatu ia kamonaia bona hanaihanai boubou patana dekenai ena boubou gaudia ia mailaia. Boubou patana ia raka hagegea, anina be ena mauri lalonai tomadiho goevana be mai anina bada.

Davida ena haheitalai be hari ita tohotohoa diba, a? Oibe. Iseda imana ita huria diba eda maoromaoro bona kerere lasi ita hahedinaraia totona bona Dirava ena boubou patana ita raka hagegea diba bema Iesu ena boubou gauna ita abidadama henia bona mai eda kudouna ibounai ida mai “kara goevagoeva, bona laloa goevagoeva” ida Iehova ita hesiai henia.​​—⁠Salamo 24:⁠4.

[Footnote]

[Picture on page 23]

Boubou patana ese Dirava ena ura ia laulaulaia, bona unai ura hegeregerena boubou gauna ia abia dae taunimanima be kara dika amo ia ruhaia totona