Basileia Haroro Ripoti

Lalokau Diravana Ia Dibaia

BRAZIL tauna ta ladana Antônio ena mauri lagani be 16 neganai, mauri ia hesikulaia vadaeni. Ia laloa ena mauri be anina lasi dainai drag ia ania kava bona ia inuinu kekero. Nega momo ia laloa sibona do ia hamasea. Unai negadiai ia be ena sinana ese ia hamaoroa herevana ia laloa: “Dirava be lalokau.” (1 Ioane 4:⁠8) To unai lalokau Diravana be edeseniai?

Antônio ia ura drag bona kekero muramura gaukaralaia karana ia hadokoa dainai, ena gabu ena pris tauna ena heduru ia tahua. Ena be Katolik dubu dekenai Antônio ia gaukara goada matamaia, to ena henanadai be do momo. Hegeregere, Iesu ena hereva, “Hereva momokani be do umui diba, bona hereva momokani ese umui do ia ruhaia” herevana, dekenai ia daradara. (Ioane 8:32) Iesu be edena bamona ruhaia karana ia gwauhamatalaia? Dubu ese ena henanadai edia haere ia henia lasi. Dokonai, Antônio ia raka oho bona ia manadalaia kara gunadia ia karaia lou. Ena drag ania kava bona inuinu kekero karana ia dika momokani.

Unai negai, Antônio ena adavana, Maria, be Iehova ena Witnes taudia ida Baibel ia stadilaia matamaia. Ena be Antônio ese iena adavana ena stadi ia koua lasi, to ia laloa Witnes taudia be “America ena gavamani ena hesiai gaukara ia karaia America tomadihona ta.”

Maria ia gari lasi, to ruma dekenai gabu idauidau ai ia laloa Antônio do ia ura duahia Watchtower bona Awake! magasin edia kopi idauidau ia atoa. Antônio be duahiduahi karana ia moalelaia dainai, nega ta ta ena adavana ia noho lasi neganai unai magasin ia duahia. Ena mauri lalonai nega ginigunana, ia ese ena Baibel henanadai edia haere ia davaria. Ia gwau, “Danu, lau ese egu adavana bona Witnes taudia edia lalokau bona hebogahisi lau dekenai lau itaia matamaia.”

Lagani 1992 ai, Antônio ese ena lalona ia hadaia, ia danu be Iehova ena Witnes taudia ida Baibel ia stadilaia totona. To, drag ia ania kava bona ia inuinu momo noho. Hanuaboi ta ai, ia bona ena turana ta be hanua maragina ta amo ruma dekenai idia giroa lou neganai, pulisi ese idia abia. Pulisi ese Antônio ena kohu lalodiai kokein idia davaria neganai, ia idia dadabaia matamaia. Pulisi tauna ta ese kopukopu dekenai ia tahoa diho bona ipidi be ena vairana kahirakahira dekenai ia atoa. Pulisi taudia ma haida idia boiboi, “hamasea!”

Antônio be kopukopu lalonai ia hekure lalonai, ena mauri ia laloa lou. Ia laloatao diba gau namodia be iena ruma bese bona Iehova. Guriguri kwadogina ia gwauraia, Iehova ena heduru totona ia noinoi. Badina ta ia noho lasi, to pulisi taudia ese ia idia rakatania. Ruma dekenai ia lao, ia diba momokani Iehova ese ia naria.

Antônio be mai goada matamatana ida Baibel ia stadilaia matamaia. Sisina sisina, ena mauri ia haidaua Iehova ia hamoalea totona. (Efeso 4:​22-24) Sibona ena ura biagua karana ia habadaia dainai, ena drag ania karana ia hanamoa matamaia. To, medikol heduru danu ia abia be namo. Hua rua lalodiai heduru abia kliniki dekenai ia noho neganai, dala ia kehoa Baibel bukadia haida ia duahia, Diba ese Mauri Dekenai Ita Ia Hakaua Lao bukana danu. Bena Antônio be unai bukadia amo ia dibaia gaudia be kliniki dekenai idia noho taudia ma haida dekenai ia herevalaia.

Antônio ese kliniki ia rakatania murinai, Witnes taudia ida ena Baibel stadi ia karaia noho. Hari, Antônio, Maria, edia natudia kekeni rua, bona Antônio ena sinana be moale bona lalo-tamona ruma besena ta bona Iehova idia hesiai henia hebou. Antônio ia gwau: “Hari lau be inai hereva ‘Dirava be lalokau’ ena anina korikori lau lalo-pararalaia.”

[Picture on page 8]

Rio de Janeiro dekenai idia haroro