Oiemu Mauri Ena Anina Oi Habadaia Diba, A?

NEGA momo anina korikorina be toana dekenai ia hedinarai lasi. United States dekenai idia halasia pepa monina mai ena siahu bada ena vairana dekenai idia torea davana be $10,000. To, unai namba idia torea pepana ena davana be toea haida sibona.

Nega ta oi laloa bema davana maragi pepapepadia ese oiemu mauri lalonai anina korikorina idia havaraia diba, a? Taunimanima momo idia laloa unai bamona ia vara diba. Taunimanima milioni momo be dina bona hanuaboi lalonai idia gaukara moni bada idia abia totona. Nega haida moni idia tahua dainai edia tauanina ena namo, edia turadia, bona edia ruma bese taudia idia dadaraia. Unai ese namo ia havaraia, a? Moni​—⁠o ia amo ita hoia gaudia​—⁠ese ia noho daudau moale korikorina ia havaraia diba, a?

Tahua gaukara taudia edia hereva hegeregerena, kohu amo moale ita tahua neganai, moale ita davaria be auka. Nius torea tauna Alfie Kohn ia gwau “moale ita hoia diba lasi. . . . Edia mauri lalonai kohu idia atoa guna taudia be nega momo idia lalo-hekwarahi, idia lalo-metau, bona noho namona idia mamia lasi.”​—⁠International Herald Tribune.

Ena be tahua gaukara taudia idia lalo-parara mauri ena anina korikori be moni dekenai amo lasi, to taunimanima momo be unai bamona idia laloa lasi. Unai be hoa gauna lasi, badina Western tanodia ai idia noho taudia be dina ta ta ibounai lalonai hoihoi gaudia idia hahedinaraia herevadia 3,000 idia duahia o kamonai. Herevana unai ese motuka o loli ta idia hahedinaraia, to edia lalohadai tamona be: ‘Inai gauna oi hoia, bona do oi moale bada.’

Kohu laloa bada karana ena namo idia habadaia dainai dahaka ia vara? Unai dainai, nega momo taunimanima ese lauma gaudia idia laloa lasi! Newsweek magasin ta ena hereva hegeregerena, Germany dekenai Cologne ena bisop badana be vanegai ia gwau, “iseda nega lalonai, Dirava idia herevalaia lasi.”

Reana oi ese emu goada ibounai oi henia tauanina durua gaudia oi abia totona. Reana oi laloa oiemu nega be sisina sibona ma gau haida oi karaia totona. To reana nega haida oi laloa, namo lasi bema mauri ena anina tamona be dina ta ta gaudia oi karaia kava ela bona gorere o buruka ese emu mauri ia hadokoa.

Lauma gaudia laloa bada karana ese emu moale do ia habadaia diba, a? Dahaka ese emu mauri ena anina ia habadaia diba?