Basileia Haroro Ripoti

Iehova Dekenai Dava Bada Gaudia be Ia Idia Lalokau Henia Taudia

BAIBEL negadia amo Lebanon be au badadia bona aniani momo gabuna. (Salamo 72:16; Isaia 60:13) Ena sida au namo hereadia be dava bada audia, momo ese idia ura henia ruma haginia totona, badina idia be mai edia hairai, mai edia bonana namona, bona idia noho daudau diba. Aposetolo taudia edia nega ai, Lebanon amo dava bada gaudia idia hedinarai. Mareko ena Evanelia bukana ia gwau Turo bona Sidono, idaunegai Lebanon ena gabu dekenai idia noho gabudia, amo “momo herea [ese] Iesu ena kara sivarai idia kamonai, bona idia mai ia dekenai.”​—⁠Mareko 3:⁠8.

Unai hegeregerena hari inai negai danu, Lebanon ese huahua momo ia havaraia bona Iehova ena matana ai idia be dava bada gaudia. Henunai idia noho ekspiriens ese unai idia hahedinaraia.

• Sikuli dekenai Witnes matamata tauna ta ladana Wissam idia hamaoroa, ena klas taudia vairanai miniti 30 lalonai hereva ta do ia henia. Wissam ia laloa unai be do ia haroro negana namona. Unai dainai ia ese buka ladana Life​​—⁠How Did It Get Here? By Evolution or by Creation? ia gaukaralaia bona Dirava ena havaraia karana dekenai hereva ta ia hegaegaelaia. To, Wissam ena tisa ese unai hereva ia duahia neganai, ia gwau unai be mai anina bada herevana ta dainai, Wissam ena hereva do ia halataia miniti 45 dekenai.

Wissam ese ena hereva ia gwauraia matamaia neganai, iena tisa ese ia koua bona ta ia siaia sikuli ena tisa badana do ia boiria totona. Daudau lasi bena tisa badana ia ginidae, bona Wissam ese ena hereva ia hamatamaia lou. Wissam ena hamatamaia herevana dekenai ia gwauraia henanadai ia kamonai neganai, sikuli ena tisa badana ia moale bada bona ia gwau stiuden ibounai ese unai hereva ena kopi ta idia abia be namo.

Nega sisina murinai, ia raka hanaia tisa ta, be klasrum lalonai ia vara moale ena rege ia kamonai bona ia henanadai dahaka ia vara noho. Ia idia hadibaia neganai, ia henanadai bema Wissam be havaraia herevana eiava evolusen herevana ia hamomokania toho. Idia haere: “Havaraia herevana.” Ia diba Wissam be Iehova ena Witnes ta neganai, unai tisa ese klas taudia ia hamaoroa: “Iena hereva amo do umui diba saiens ese havaraia herevana ia durua, evolusen herevana lasi.”

Ia hedinarai unai tisa be mai ena Creation bukana bona ia gaukaralaia iunivesiti dekenai hereva ia henia totona! Idia ia do rakatania lasi neganai, ia henanadai bema murina dinana ai ena stiuden taudia ida ia giroa mai diba, Wissam ese ena klas taudia do ia hereva henia totona. Unai amo Iehova idia hanamoa nega namona ma ta ia vara.

• Ena mauri lagani be 22 kekenina Nina be hereva momokani totona ia ranu mase. Dina ta ena kasin ese ia dekenai Baibel ta ia henia bona Pentecostal dubuna dekenai ia hakaua. Nina be mai ena moale ida Baibel ia duahia bona ena duahiduahi karana amo ia lalo-parara Keristani taudia idia haroro be namo, unai dainai ena turadia ia hereva henia matamaia. Ia hereva henia taudia ibounai ese ia idia nanadaia: “Oi be Iehova ena Witnes tauna ta, a?” Unai ese ia hahoaia.

Lagani 6 murinai, Iehova ena Witnes taudia be Nina ena ruma idia lao bona ia dekenai Dirava ena Basileia idia herevalaia. Matamanai, edia hahediba herevadia dekenai kerere ia tahua. To, ia davaria edia haere ibounai be maoro bona idia be Baibel amo.

Gabeai Nina ia dibaia gaudia​—⁠Dirava ena ladana, Iehova; Basileia ena hahenamo idauidau; bona ma gau haida​—⁠amo ia diba momokani ia ese hereva momokani ia davaria. Ena mauri be Dirava dekenai ia gwauhamatalaia bona ia bapatiso. Idia hanaia lagani 7 lalodiai, Nina be ful-taim haroro gaukarana ia karaia. Momokani, Iehova ese ia idia lalokau henia momokani taudia ia hanamoa.​—⁠1 Korinto 2:⁠9.