Basileia Haroro Ripoti

Chile Dekenai Hereva Momokani Ena Uhe Idia Dairia

CHILE ena not kahanai ia noho tano gagaena dekenai, reana lagani momo idia hanaia bena medu do ia mai. To medu ia diho neganai, unai kaukau, nadi momo tanona be palaoapalaoa mai ena kala idauidau gabuna ai ia lao. Loaloa taudia be tano ena kahana idauidau amo idia mai unai palaoapalaoa ena kala idauidau idia itaia totona.

To, Chile taudia huanai gau idauna namo hereana ta ia vara noho. Baibel ena hereva momokani ena ranu be tano ena kahana ibounai dekenai ia aru lao noho, bona lalo-momokani taudia momo be Iesu Keriso ena hahediba taudia ai idia lao noho. Hereva momokani ena ranu halasia dalana ta be telefon amo. Henunai idia noho ekspiriens ese unai haroro dalana amo ia vara anina namona ia hahedinaraia.

• Ful-taim evanelia gaukarana ia karaia kekenina ladana Karina idia noia sekit hebouhebou ena program dekenai telefon amo haroro dalana do ia hahedinaraia. To, Karina be nega ta unai haroro gaukara ena kahana ia karaia lasi. Unai hebouhebou ena program lalonai ia vareai totona, elda ta mai ena adavana be Karina idia hagoadaia bona ia ida telefon amo ia haroro diba daladia haida idia herevalaia. Ia idia hagoadaia danu unai gauna dainai Dirava ena heduru totona ia guriguri. Ia karaia bona dokonai ena lalona ia hadaia telefon amo ta do ia rini henia.

Karina ese kahirakahira ia noho hanua ia rini henia. Telefon naria hahine ia haere, bona Karina ese ia rini henia ena badina ia gwauraia hedinarai. Telefon naria hahine ia kamonai namonamo, bona dala idia karaia dina toi murinai do idia hereva lou. Telefon amo lou henia ia karaia bona Baibel stadi ia hamatamaia, Dirava Ia Ura Dahaka Ita Karaia? buklet ia gaukaralaia. Unai nega amo, lalona ena ura habadaia bona hagoadaia Baibel stadi karana idia moalelaia, bona unai hahine ena henanadai haerelaia totona Karina ese buka bona magasin ia siaia.

• Tau ta ia kerere bona Bernarda ia rini henia, Bernarda ese ena lalona ia hadaia unai tauna ia hereva henia totona. Bernarda ia badu lasi, to ia gwau ia be Iehova ena Witnes hahinena ta bona ia nanadaia bema heduru ia henia diba. Idia herevahereva matamaia, bona Dirava ena Basileia ese kahirakahira kara gageva do ia haorea karana ia herevalaia neganai, unai tauna ia kamonai. Unai tauna ese Bernarda dekenai ena telefon namba ia henia, bona telefon amo lou henia ia karaia. Edia herevahereva ta lalonai, Bernarda ese Diba ese Mauri Dekenai Ita Ia Hakaua Lao bukana ena kahana ta be unai tau dekenai ia duahia. Ia nanadaia edena bamona buka ta ia abia diba, bona Bernarda ese unai buka bona Baibel ta ia siaia. Dala idia karaia unuseniai ia noho tadikaka ta ese ia vadivadi henia totona, bona hari unai “tubutubu gauna” be “ranu” amo idia dairia noho.

Oibe, inai tanobada ena lauma tano kaukauna dekenai, hehuni dekenai idia noho uhedia be hereva momokani ena mauri ranuna idia abia neganai idia tubu. Ranu mase taudia tausen momo be idia “tubu namonamo” bona Iehova Dirava ena abidadama hesiai taudia ai idia lao noho.​​—⁠Isaia 44:​3, 4.