Ia Tahua Daudau Dainai Hahenamo Ia Abia

“IEHOVA? Iehova be daika?” Ena mauri lagani be 8 kekenina, Silvia, ese Armenia gado Baibel lalonai unai ladana ia itaia, kekeni maragina ta ese ia hadibaia. Haida ia nanadaia, to ia noho gabuna Yerevan, Armenia dekenai, ta ese ia hamaoroa diba lasi Iehova be daika​​—⁠ena tama sina, tisa taudia, bona ena dubu ena haroro taudia danu.

Silvia ia bada, sikuli ia haorea, bona gaukara ta ia abia, to ia do diba lasi Iehova be daika. Ia matamata neganai, Armenia amo ia heau mauri, bona nega sisina murinai Poland dekenai, daiutu maragina ta lalonai heau mauri taudia haida ida ia noho. Daiutu tamona dekenai idia noho hebou kekenina ta dekenai, hanaihanai vadivadi taudia idia mai. Silvia ia nanadaia: “Oiemu vadivadi taudia be daidia?” Ia haere: “Idia be Iehova ena Witnes taudia, Baibel amo lau idia hadibaia totona idia mai.”

Iehova ena ladana ia kamonai neganai, Silvia ia moale bada. Gabeai, ia dibaia matamaia Iehova be daika bona ia diba ia be lalokau Diravana. To, daudau lasi murinai, Poland ia rakatania. Baltic Davara ena kahana, Denmark dekenai, heau mauri gabuna ia tahua. Kohu haida sibona ia abia lao, to unai kohu lalonai Iehova ena Witnes taudia ese idia karaia buka bona magasin idia noho. Buka ta ena murina rauna dekenai Silvia ese Watch Tower Society ena brens opesi idauidau edia adres edia lista ia itaia. Unai be ena mai anina bada kohuna ta​​—⁠Iehova kahirakahira ia lao totona ia durua!

Denmark dekenai, Silvia idia abia lao heau mauri taudia edia kamepa ta dekenai, bona maoromaoro Iehova ena Witnes taudia ia tahua matamaia. Iena adres lista amo ia diba Watch Tower Society ena brens opesi Denmark dekenai be taoni ta ladana Holbæk dekenai ia noho. To unai be edeseniai? Silvia be trein amo idia abia lao ma kamepa ta dekenai, bona dala dekenai, trein be Holbæk ia hanaia! Unai negai danu ia moale bada.

Unai murinai siahu dinana ta ai, Silvia ese trein ia abia bona Holbæk dekenai ia giroa lou bona trein steiseni amo ia raka ela bona brens opesi dekenai. Ia gwau: “Uma gabu dekenai lau vareai neganai, pata ta dekenai lau helai bona sibona dekenai lau gwau, ‘Inai be paradaiso!’ ” Mai lalokau ida brens opesi dekenai ia idia abia dae bona Baibel stadi ta ia abia.

To unai murinai kamepa idauidau dekenai ia lao. Heau mauri kamepa ta ta dekenai, Silvia ese Iehova ena Witnes taudia ia tahua bona ena Baibel stadi ia karaia loulou. To, lagani rua idia ore murinai, gau momo ia dibaia dainai ena mauri be Iehova dekenai ia gwauhamatalaia diba. Bapatiso ia abia bona daudau lasi murinai ful-taim hesiai gaukara ia hamatamaia. Lagani 1998 ai, Denmark ena gavamani taudia ese gwaumaoro idia henia unuseniai do ia noho.

Hari, Silvia ena mauri lagani be 26 bona paradaiso bamona gabuna dekenai ia gaukara noho, Iehova ena Witnes taudia edia brens opesi, Denmark ai. Hari ia gwau: “Dahaka lau gwau diba? Kekeni maragi negana amo Iehova lau tahua. Hari ia lau davaria vadaeni. Lau laloa egu mauri do lau gaukaralaia ena hesiai gaukara dekenai, bona hari Betele dekenai lau noho. Lau guriguri lagani momo lalonai inai ruma be egu noho gabuna ai do ia lao!”