Hahine Rua Idia Vabu Neganai Edia Mauri Ia Haidaua Dalana

SANDRA be Australia dekenai ia noho vabu ta. Lagani haida gunanai, ena adavana ia mase neganai, Sandra ia hoa bada. Ia gwau: “Karaharaga, lau diba egu adavana bona turana namona lau haboioa bona unai ese egu lalona ia hametaua bada. Hospital amo ruma dekenai lau giroa bona unai dina orena lalonai lau karaia karadia lau laloatao diba lasi. Wiki haida lalonai, egu gari be tauanina hisihisi hanaihanai karana ai ia lao.”

Sandra be mai ena turana ta, Elaine, iena mauri lagani ese iena ia hanaia, bona lagani 6 bamona lalonai ia be vabu ta. Elaine be hua 6 lalonai ena adavana, David ia naria, bena kensa gorerena dainai ia mase. Ena adavana ia mase daudau lasi murinai, ena lalohisihisi ia bada herea dainai, nega sisina lalonai ia matakepulu. Lagani rua murinai, taunimanima vairanai ia maserea. Ena doketa ese gorere ta ia davaria lasi. To, ia davaria Elaine be ena lalohisihisi ia hahedinaraia lasi, unai dainai ia hamaoroa do ia giroa lou ena ruma dekenai bona do ia hekwarahi ia tai totona. Elaine ia gwau, “nega sisina bada lau haorea egu lalohisihisi lau lalohadailaia totona,” bona sibona ia noho neganai ia gwau, “daiutu dekenai lau vareai bona egu kwarana be David ena dabua amo do lau koua.”

Oibe, lalokau adavana ia mase neganai, kara idauidau ia havaraia diba, badina vabu be adavana lasi hahine sibona lasi, to gau ma haida idia vara danu. Hegeregere, Sandra be nega sisina lalonai ia laloa ena mauri be guna bamona lasi. Vabu matamata momo hegeregerena, ia danu ia lalo-manoka bona gari mamina ia abia. Sandra ese unai nega ia laloatao, ia gwau: “Egu adavana ese gau momo ia abia hidi lau totona lau manadalaia, bena karaharaga unai bamona gaudia be lau sibona lau abia hidi. Lau mahuta namonamo diba lasi. Lau hesiku bona egu goada ia ore. Dahaka do lau karaia be lau laloa momo.”

Dina ta ta ai, tanobada ibounai lalonai, hahine momo edia sivarai be Sandra bona Elaine edia sivarai bamona. Gorere, aksiden, tuari, idau bese hamasea karana, bona idia vara dagedage ma haida ese vabu taudia edia namba idia habadaia.a Unai hahine momo be edia lalohisihisi idia gwauraia lasi, bona idia diba lasi dahaka do idia karaia. Turadia bona varavara be vabu idia durua edia noho idauna idia manadalaia totona dahaka idia karaia diba? Hereva gabena be mai ena heduru herevadia haida bona reana idia do ia durua diba.

[Footnote]