Duahia Taudia Edia Henanadai

Taravatu mauana idia huaia au idia atoa dalana be edena bamona, badina 1 King Taudia 8:8 ese ia hahedinaraia Helaga Gabuna amo idia itaia diba?

Iehova ese tano gagaena ai palai dubuna karaia palanina be Mose dekenai ia henia neganai, mai anina bada gauna ta be taravatu mauana. Unai golo amo idia koua mauana lalonai, Taravatu nadi palakana bona gau haida idia noho. Ia be lalona momokani daiutuna, Helaga Herea Gabuna, dekenai idia atoa. Maua ena koua gauna latanai be golo kerubi rua, edia hanina be idia kehoa. Maua ena kahana kahana dekenai rini idia noho, unai amo akasia au amo idia karaia au rua, golo amo idia koua gaudia, dekena amo idia huaia diba. Ita gwau diba, unai au be rini lalonai idia atoa vareai Maua ena lata hegeregerena. Unai dainai, palai dubuna be ist kahana ia vaira henia bona Maua be Helaga Herea Gabuna ai ia noho neganai, au be not ia lao saut hegeregerena idia noho. Gabeai Maua be Solomona ese ia karaia dubu lalonai ia noho neganai danu be unai bamona.​—⁠Esodo 25:​10-22; 37:​4-9; 40:​17-21.a

Dabua ta ese Helaga Herea Gabuna be Helaga Gabuna (murimuri daiutuna) amo ia hapararaia. Helaga Gabuna ai idia noho pris taudia ese Helaga Herea Gabuna lalonai Dirava ia noho ia laulaulaia Mauana do idia itaia lasi. (Heberu 9:​1-7) Unai dainai, reana 1 King Taudia 8:8 ena hereva ita daradaralaia, ia gwau: “Unai huaia audia be lata herea dainai, edia duduna be tau ta ia itaia diba, bema Helaga Herea Gabuna ena vairana dekenai ia gini neganai, to Helaga Herea Gabuna ena murina kahana dekena amo ia itaia diba lasi.” Sivarai Iharuana 5:9 ese unai hereva tamona ia gwauraia danu. Edena bamona ta ese dubu ena Helaga Gabuna dekena amo unai au ia itaia diba?

Haida idia laloa au be koua dabua dekenai idia kamokau dainai edia toana idia hedinarai. To unai ia vara diba lasi bema au be not ia lao saut hegeregerena idia noho, bona koua dabua be au idia noho hegeregerena ia noho danu. (Numera 3:38) Unai hereva hahedinaraia dalana maorona ia noho. Bema koua dabua bona dubu ena haba huanai pada sisina ia noho, reana au idia itaia diba, eiava bema hahelaga tauna be Helaga Herea Gabuna dekenai ia vareai neganai idia itaia diba. Dabua ese Maua itaia dalana ia koua, to kahana kahana idia noho au be reana unai pada sisina amo ia hedinarai. Ena be inai hereva ia hegeregere ita lalo-pararalaia totona, to namo lasi unai lalohadai ita dogoatao auka.

Ia hedinarai goevagoeva, gau momo ita do dibaia lasi. Aposetolo Paulo ese Heberu taudia dekenai ia torea revarevana lalonai unai gau haida ia herevalaia. Bena ia gwau: “Harihari inai gau ibounai do ai herevalaia lasi.” (Heberu 9:⁠5) Ia mai noho abidadama taudia edia toreisi lou ese dala namona do ia kehoa Mose, Arona, Besalele, bona palai dubuna ena palani bona ena gaukara idia diba bona karaia taudia ma haida amo gau momo do ita dibaia.​—⁠Esodo 36:⁠1.

[Footnote]