Lai Koua Gabuna

EUROPE ena ororo atai kahanai, tubutubu gaudia goadadia ladana alpine rose do oi davaria diba. Unai tubutubu gaudia maragidia be nega momo tano badinai idia tubu badina ororo edia lai goadadia amo idia hunia. Lai goadana ese ororo ena tubutubu gaudia ia hadikaia gwauraia, badina edia siahu ia hamaragia, hodahoda bona tano ia hakaukaua, bona edia ramuna ia ragaia.

Unai tubutubu gaudia maragidia be nega momo lai goadana amo idia hunia totona nadi huanai idia tubu. Ena be unai gabu dekenai tano be bada momokani lasi, to nadi ese lai idia koua bona unai tubutubu gaudia ese ranu idia dogoatao diba. Lagani ena kahana badana lalonai idia hedinarai lasi, to siahu neganai unai tubutubu gaudia ese flaoaflaoa kakakakadia amo ororo idia hahairaia.

Peroveta tauna Isaia ia gwau Dirava ese “lohia taudia” do ia abia hidi, bona idia ta ta ibounai be “lai koua gabuna” bamona. (Isaia 32:​1, 2) King Keriso Iesu ena hakaua henunai, unai lauma lohia taudia, eiava naria taudia, be idia gini goada nadidia bamona, lalo-hekwarahi eiava lalo-metau negadia ai idia gini goada. Hekwakwanai negadia ai heduru idia henia bona dabu taudia idia durua, edia lauma ranuna Dirava ena Hereva amo idia gimaia totona.

Lai goadana hegeregerena, dagedage, lalo-manoka, eiava gorere ese Keristani tauna ta ia botaia hanaihanai diba, bona ta ese ia gimaia lasi neganai ena abidadama ia manoka ia lao. Keristani elda taudia ese ia do idia gimaia diba bema ena hekwakwanai idia kamonai namonamo, Baibel ena sisiba idia henia, bona idia hagoadaia eiava dala ta ai heduru idia henia. Edia King, Keriso Iesu, hegeregerena, “idau gabu idau gabu dekenai” idia negea taudia bamona idia ura durua. (Mataio 9:36) Bona idia ura hahediba koikoi ena lai ese ia hadikaia taudia idia durua. (Efeso 4:14) Unai bamona heduru nega korikori ai be mai anina bada.

Miriam ia gwau: “Egu turadia namodia haida be hereva momokani idia rakatania, bona unai nega tamona lalonai, egu tamana ena harana dekenai rara varona ta ia dika neganai, lau lalohisihisi bada. Egu daradoko lau hanaia toho totona murimuri merona ta lau bamoa matamaia. Nega sisina murinai, lau mamia lau be hegeregere lasi dainai, kongregesen elda taudia lau hadibadia hereva momokani lau rakatania gwauraia, badina lau laloa Iehova be lau ia lalokau henia diba lasi.”

“Unai nega lalonai, mai ena hebogahisi elda tauna ta ese regula painia gaukara lau karaia laganidia ia herevalaia. Lau ia hamaoroa hanaihanai egu abidadama karana ia laloa bada, bona mai ena hebogahisi ida lau ia noia elda taudia edia heduru lau abia dae totona, Iehova ena lalokau lau mamia totona lau idia durua. Unai nega dikana lalonai lauma dalanai lai badana be lau ia hadikaia gwauraia bamona bona edia lalokau lau dekenai be “lai koua gabuna” bamona. Hua ta lalonai, egu hetura karana murimuri merona ida lau hadokoa, bona unai negana amo ema bona hari hereva momokani ena dala dekenai lau raka noho.”

Elda taudia be idia moale bema nega korikori ai heduru idia henia dainai Keristani taudia be lauma dalanai idia goada. Bona unai ‘hunia gabudia’ dainai Keriso ena Lagani 1,000 Lohia Negana lalonai do ita abia lauma heduruna be hari ita mamia diba.