Duahia Taudia Edia Henanadai

Iesu be goevadae lasi rami-hebou kekenina Maria ena bogana lalonai ia tubu dainai Iesu be mai ena kerere ta, a?

Toretore helagana lalonai, ‘Iesu ena vara’ sivaraina ia gwau: “Iena sinana Maria be Iosepa ena maoheni, to idia ruaosi nega ta do idia mahuta hebou lasi, Lauma Helaga ese Maria ia harogorogoa.” (Mataio 1:18) Momokani, Maria ena rogorogo negana lalonai Dirava ena lauma helaga ena gaukara be mai anina bada.

To, Maria be edena bamona? Ena rogorogo lalonai ena gatoi be mai ena gaukara, a? Dirava ena gwauhamata Aberahamo, Isako, Iakobo, Iuda, bona King Davida​—⁠Maria ena sene taudia​—⁠dekenai ita laloa neganai, ita diba gau badana be do ia vara natuna be edia tubuna korikorina. (Genese 22:18; 26:24; 28:​10-14; 49:10; 2 Samuela 7:16) Unai dala tamona ai, Maria ia abia natuna ese Dirava ena gwauhamata ia hagugurua diba, ani? Ia be Maria ena natuna korikorina be mai anina bada.​​—⁠Luka 3:​23-34.

Iehova ena aneru be rami-hebou kekenina Maria dekenai ia hedinarai, ia gwau: “Maria e, oi gari lasi, badina be oi dekenai Dirava ia moale vadaeni. Oi be do oi rogorogo, mero ta do oi abia, iena ladana do oi atoa Iesu.” (Luka 1:​30, 31) Rogorogo ia matamaia totona sel ta be gatoi lalonai ia vareai bona mauri ia matamaia. Iehova Dirava ena hoa karana ta dainai Maria ena bogana lalonai ia noho gatoi dekenai unai bamona ia vara, Iehova ese unai ia karaia lalonai ia sibona ia havaraia Natuna tamona be guba amo tanobada dekenai ia atoa.​​—⁠Galatia 4:⁠4.

Goevadae lasi hahine ena bogana lalonai unai dala ai natuna ia tubu matamaia dainai, natuna ena tauanina be do ia goevadae bona kara dika ese do ia guia lasi, a? Goevadae gauna bona goevadae lasi gauna idia haboua karana amo ia vara gauna be edena bamona? Oi laloatao Dirava ena Natuna ena mauri siahuna goevadaena ia siaia totona lauma helaga ia gaukaralaia, bena Maria ia rogorogo. Unai dainai Maria ena gatoi lalonai idia noho goevadae lasi gaudia ese do ia vara natuna idia hadikaia lasi bona ena mauri ena matamana amo ia goevadae.

Herevana edena dala ai unai mauri ia matamaia, to ita diba momokani unai nega ai Dirava ena lauma helaga ena gaukara dainai Dirava ena ura ia guguru. Aneru Gabriela be Maria ia hamaoroa: “Lauma Helaga be oi dekenai do ia diho, bona Dirava ena siahu oi dekenai do ia atoa. Vadaeni, oi dekena amo do ia vara, inai mero helagana, be Dirava ena Natuna do idia gwauraia.” (Luka 1:35) Oibe, unai natuna be bogana lalonai ia tubu matamaia negana amo, Dirava ena lauma helaga ese ia gimaia dainai, goevadae lasi gauna ta eiava dika ta ese ia dekenai kerere ta ia havaraia lasi.

Ia hedinarai goevagoeva, Iesu be ena guba Tamana amo ena mauri goevadaena ia abia, taunimanima ta amo lasi. Iehova ese Iesu dekenai ‘tauanina ia abia hegaegae,’ bona Iesu be​​—⁠bogana lalonai ia tubu matamaia negana amo​​—⁠ia “kara dika lasi, kerere ta lasi. Ia be kara dika taudia bamona lasi.”​​—⁠Heberu 7:26; 10:⁠5.

[Picture on page 19]

“Oi be do oi rogorogo, mero ta do oi abia”