Hehuni Herevana Hahedinaraia Negana

Hereva haida idia hahedinaraia lasi ese maino ia havaraia diba. To hehuni herevana hahedinaraia negana ia noho, a? Peroveta tauna Amosa ese iena Dirava ia herevalaia dalana mani oi laloa: “Kara ibounai Lohiabada Dirava ia ura karaia gwauraia neganai, ia ese iena hesiai taudia, peroveta taudia [“dekenai iena hehuni herevadia,” NW ] ia hamaorodia guna.” (Amosa 3:⁠7) Unai hereva amo, ita ese hehuni herevadia dekenai gau ta ita dibaia diba. Iehova ese nega sisina lalonai hereva haida ia hunia bona gabeai taunimanima haida dekenai ia hahedinaraia. Iehova ena kara be edena bamona ita tohotohoa diba?

Nega haida, Keristani kongregesen lalonai idia abia hidi mamoe naria taudia idia laloa hereva haida idia hahedinaraia lasi ese namo ia havaraia. (Kara 20:28) Hegeregere, kongregesen ena namo idia laloa noho dainai, idia laloa idia hegaegaelaia daladia haida eiava kongregesen ena maduna haida idia haidaua be do idia gwauraia hedinarai lasi ela bona ena nega korikori.

Unai bamona ia vara neganai, gau badana be unai kara lalonai idia vareai taudia dekenai do idia hahedinaraia goevagoeva edena nega ai, bona edena dala ai unai gaudia do idia gwauraia hedinarai. Taunimanima vairanai gau ta do idia gwauraia hedinarai negana korikori idia diba ese idia ia durua, hehuni herevana do idia gwauraia hedinarai lasi totona.​​—⁠Aonega Herevadia 25:⁠9.