“Lau Tahua Gaudia Ibounai Lau Davaria”

WORLD Health Organization ena ripoti ta hegeregerena, tanobada hegegemadai taunimanima milioni 120 mai kahana be daradoko hemamina idia mamia. Lagani ta ta ai, taunimanima milioni ta be sibona idia hamasea bona milioni 10 bona 20 bamona be sibona idia hamasea toho. Daradoko taudia dekenai dahaka heduru ia noho? Medikol heduru ese hisihisi ia hamaragia, bona hemami dalanai idia durudia be gau badana. Danu, unai bamona hisihisi idia davaria taudia haida be Iehova ena Witnes taudia edia Baibel idia herevalaia bukadia bona magasin amo heduru idia abia, France amo ia mai revareva ta ese ia hahedinaraia bamona.

“Vanegai sibona, lau mauri noho ena badina lau lalo-pararalaia lasi. Dirava lau guriguri henia lau ia hamasea totona. Unai be hegeregere lauegu lalona dekenai lau mase vadaeni. Heduru lau tahua bona Iehova dekenai lau guriguri goadagoada. Danu, egu lalona lau hadaia lagani 2002 Yearbook of Jehovah’s Witnesses bukana lau duahia totona, bona dina toi lalonai lau haorea. Lau gwau diba unai buka ese lau ia hagoadaia bada bona egu abidadama ia hagoadaia.

“Lau ese Gima Kohorona bona Awake! magasin edia hereva haida lau tahua bona lau hoa dikadika! Lagani 15 lalonai unai magasin lau duahidia vadaeni, to lau lalo-pararalaia lasi gauna be inai magasin ese ta ia hagoadaia bona ena lalona ia veria diba. Unai magasin be lalokau amo idia honu​​—⁠hari inai negai unai kara ia hedinarai momo lasi. Lau tahua gaudia ibounai lau davaria.”

Baibel ia gwau: “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.” (Salamo 34:18) Ita daradara lasi, “lalohisihisi taudia” eiava “edia lalona ia ore taudia” ese hagoadaia herevadia bona vaira negana ena helaro be Baibel lalonai idia davaria diba. Iehova ena Witnes taudia ese Baibel idia herevalaia buka bona magasin idia hariharilaia, heduru idia ura taudia be Dirava ena amo ia mai hagoadaia herevadia amo namo idia davaria totona.