Duahia Taudia Edia Henanadai
Satani Diabolo be taunimanima ese idia laloa gaudia ia diba, a?
Ena be ita diba momokani lasi, to toana be Satani eiava iena demoni be idia hegeregere lasi ita laloa gaudia idia diba totona.
Mani Satani dekenai idia henia ladana idauidau ita laloa. Ia idia gwauraia Satani (Gwau-edeede Tauna), Diabolo (Ladana Hadikaia Tauna), Gaigai (Koikoi Tauna ida idia hahegeregerea), Hedibagani Tauna, bona Koikoi Tauna. (Iobu 1:6; Mataio 4:3; Ioane 8:44; 2 Korinto 11:3; Apokalupo 12:9) Unai ladana ta ese ia hahedinaraia lasi Satani be ia hegeregere taunimanima idia laloa gaudia ia diba totona.
To, Iehova Dirava be idau, Baibel ia gwau ia be “kudou ia tohoa” tauna. (Aonega Herevadia 17:3; 1 Samuela 16:7; 1 Sivarai 29:17) Heberu 4:13 ia gwau: “Gau ta Dirava dekena amo ita hunia diba lasi. Dirava ese ia karaia gaudia ibounai nega ibounai ia itaia noho. Idia be hanaihanai iena matana edia vairanai idia noho. Bona Dirava ese danu iseda kara do ia kota henia.” Unai dainai ita hoa lasi, Iehova ese iena Natuna, Iesu, dekenai siahu ia henia taunimanima edia kudouna ia tahua totona. Ia toreisi lou tauna Iesu, ia gwau: “Lau be taunimanima ibounai edia laloa bona edia ura lau diba. Bona umui danu ta ta emui davana do lau henia, emui kara, emui kara hegeregerena.”—Apokalupo 2:23.
Baibel ia gwau lasi Satani be ia hegeregere taunimanima edia kudouna bona lalona ia tahua totona. Unai be mai anina bada, badina aposetolo Paulo ese ita ia hagoadaia Keristani taudia be ‘[Satani] ena koikoi idia diba vadaeni.’ (2 Korinto 2:11) Unai dainai namo lasi Satani ita gari henia bena ita laloa ia be mai ena kara idaudia haida, ita diba lasi karadia unai.
To, namo lasi ita gwau iseda Inai Tauna be iseda manoka gaudia ia itaia lasi. Satani be nega daudau lalonai taunimanima edia kara ia stadilaia vadaeni. Satani be ita laloa gaudia ia diba be badina lasi, iseda kara, edena moale karadia ita tahua, eiava dahaka gaudia ita herevalaia, bona gau ma haida ia diba totona. To, iseda vairana ena toana bona eda kara danu ese reana ita lalohadailaia eiava ita mamia noho gaudia idia hahedinaraia.
To, Satani ese Eden umana lalonai ia gaukaralaia tarapudia—hereva koikoi, kara koikoi, bona sivarai kereredia—ia gaukaralaidia noho. (Genese 3:1-5) Ena be Keristani taudia idia diba Satani be idia laloa gaudia ia diba lasi, to Satani ese edia kudouna lalonai ia atoa lalohadai dainai idia laloa momo. Ia ura Keristani taudia edia lalona ia hakererea bona “hereva momokani idia rakatania.” (1 Timoteo 6:5) Unai dainai ita hoa lasi, Satani ena tanobada ese sivarai bona moale karadia dikadia momo herea ia halasia noho. Keristani taudia ese unai dika gaudia idia haheaukalaia bona edia lalona idia gimaia totona, hahemauri ena “tuari kwara gauna” idia atoa be gau badana. (Efeso 6:17) Unai idia karaia dalana be edia lalona be Baibel ena hereva momokanidia amo idia hahonua bona Satani ena tanobada ese ia halasia siahu dikadia idia dadaraia.
Satani be iseda inai tauna badana. To, namo lasi ia eiava iena demoni ita gari henidia. Iamesi 4:7 ese ita ia hagoadaia, ia gwau: “Satani do umui tuari henia, vadaeni umui dekena amo do ia heau boio.” Bema unai sisiba ita badinaia, Iesu bamona, ita ibounai do ita gwau: ‘Satani be ita dekenai mai ena siahu lasi.’—Ioane 14:30.