“Taunimanima Rua be Emai Iduara Dekenai Idia Pidipidi”

“LAGANI rua idia orea vadaeni emai kekeni maragina ai halusia bona ai lalo-hisihisi bada herea.” Saint-Étienne, France dekenai, Le Progrès niuspepa lalonai idia halasia revareva ta be unai bamona ia hamatamaia.

“Mélissa ena mauri lagani be hua toi bona ia be mai ena gorere dikana ta ladana trisomy 18. Unai bamona dika badana oi laloaboio diba lasi, ia vara be maoro lasi momokani. Ena be Katolik tomadihona ai ai tubu daekau, to inai lalohadai be nega momo ai laloa, ‘Dirava, bema oi mauri noho, dahaka dainai inai gaudia oi koua lasi?’ ” Ia hedinarai goevagoeva, unai revareva ia torea sinana be ia lalo-metau bada bona sibona ia durua diba lasi. Ma ia gwau:

“Unai gaudia idia vara bena nega sisina murinai, taunimanima rua be emai iduara dekenai idia pidipidi. Maoromaoro, lau diba idia be Iehova ena Witnes taudia. Lau hegaegae mai hemataurai ida idia lau hamaoroa do idia lao totona, to edia imana dekenai idia hariharilaia buklet ta lau itaia. Unai buklet ese dahaka dainai Dirava ese hisihisi ia koua lasi herevana ia hahedinaraia. Unai dainai idia lau boiria vareai edia lalohadai do lau hakoikoia totona. Hisihisi ita herevalaia neganai, lau laloa egu ruma bese be hisihisi bada ai mamia vadaeni. Bona anina lasi herevadia hegeregere, ‘Dirava ese emai natuna kekenina ia henia dainai, Ia ese ma ia abia lou’ herevana dekenai ai hesiku vadaeni. Unai Witnes kekeni rua be hora ta mai kahana idia noho. Mai hebogahisi danu lau idia kamonai henia, bona lau idia rakatania neganai, egu mamina be ia namo bona lau ura idia vadivadi lou. Lagani rua gunanai unai ia vara. Lau be Iehova ena Witnes hahinena ai lau lao lasi, to idia danu Baibel lau stadilaia matamaia, bona nega momo edia hebou dekenai lau lao.”