Heduru Korikorina Ogogami Taudia Totona
IESU Keriso, Dirava ena natuna, be tanobada dekenai ia noho neganai, mai momokani ida ogogami taudia ia durudia. Iesu ena haroro gaukara ia itaia tauna ta, ia gwau: “Matakepulu taudia edia matana idia kehoa, aena dika taudia idia raka, lepera taudia idia goeva, taia kudima taudia idia kamonai, mase taudia idia toreisi lou, bona ogogami taudia ese Sivarai Namona idia abia dae.” (Mataio 11:5) To, hari inai negai idia noho ogogami taudia milioni momo herea be edena bamona? Idia totona sivarai namona ta ia noho, a? Oibe, helaro sivaraina ia noho!
Ena be nega momo taunimanima ese ogogami taudia idia laloa bada lasi bona idia laloaboio, to Dirava ena Hereva, Baibel, ia gwauhamata ia gwau: “Gau lasi taudia, be Dirava ese ia laloaboio lasi. Ogogami taudia edia abidadama, be abidadama kava lasi. Edia abidadama ena anina be do ia boio ore lasi, to gabeai do ia vara.” (Salamo 9:18) Dirava ena Basileia, guba gavamani korikorina ta, ese taunimanima edia lohia dalana do ia kokia bona ena gabu ai ia lohia neganai, unai hagoadaia herevadia do idia guguru momokani. (Daniela 2:44) Iesu be unai guba gavamanina ena King dainai, “ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.”—Salamo 72:13, 14.
Keriso be tanobada do ia lohiaia neganai, taunimanima edia noho dalana be edena bamona? Iena lohia siahuna henunai do idia noho taudia ese edia gaukara amo ahuna namona do idia moalelaia. Mika 4:3, 4 dekenai Baibel ia gwau: “Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi. Siahu Ibounai Lohiabada ese inai bamona ia gwauhamata vadaeni.” Dirava ena Basileia ese danu gorere bona mase ena hekwakwanai do ia haorea. (Isaia 25:8) Tanobada do ia idau vaitani! Unai Baibel ena gwauhamata herevadia ita abia dae diba, badina idia be Dirava ese ena lauma amo ia havaraia herevadia.
Baibel ese helaro sivaraina sibona ia gwauraia lasi, to ita ia durua dina ta ta ena hekwakwanai ita haheaukalaia, hegeregere ogogami dainai sibona matauraia lasi karana ita hanaia totona. Ogogami Keristani tauna ta be Baibel stadilaia karana amo ia diba, Dirava ena matana ai ia be mai anina bada, taga Keristani tauna be Dirava ena matana ai ia be mai anina bada hegeregerena. Baibel bukana Iobu ese ia hahedinaraia “Dirava ese taunimanima ibounai, be maka tamona dekena amo ia kota henidia noho, ia ese idia ibounai ia karaia dainai.” (Iobu 34:19) Dirava ena lalokau ogogami bona taga tauna totona be hegeregere.—Kara 10:34, 35.