Natuna Hadibaia Ena Hekwarahi Hari Inai Negai
HANUABOI ta ai, aniani gabuna ta ena biaguna be ia hegaegae ena gabu ia koua bona ruma dekenai ia lao totona. Bena hahine rua bona natuna ta idia vareai bona aniani idia oda. Biaguna ia hesiku bada dainai ia ura ia gwau gabu ia koua vadaeni, to ena lalona ia haidaua bona edia aniani ia hegaegaelaia. Hahine ruaosi idia herevahereva bona aniani lalonai, natuna be unai gabu dekenai ia heau loaloa, bisikesi be foloa dekenai ia negedia bona ena aena amo ia hamakohia. Natuna ena sinana ese ia koua lasi, to ia kiri sibona. Unai gabu idia rakatania murinai, ia hesiku bada biaguna ese foloa ia hagoevaia.
Reana oi diba vadaeni, unai vara momokani sivaraina ese ia hahedinaraia, ruma bese momo lalonai natudia be idia hadibaia namonamo lasi. Unai ena badina be idauidau. Tama sina momo ese natudia idia rakatania sibona edia ura idia karaia totona, idia laloa natudia be ura kwalimu lalonai idia tubu be namo. Eiava tama sina idia bisi bada dainai, reana nega idia atoa lasi edia natudia idia laloa bona hadibaia totona. Tama sina haida idia laloa natuna ena edukeisen be mai anina bada gauna, unai dainai natuna ena kara ta idia koua lasi bema sikuli lalonai greid namodia ia abia bona ladana bada koledi ta dekenai ia lao diba.
To, haida idia gwau tama sina bona taunimanima iboudiai ese idia badinaia mauri taravatudia idia haidaua be namo. Badina idia gwau natudia be taravatu utua karadia idauidau idia karaia bona sikuli dekenai dagedage karadia idia bada idia lao noho. Unai dainai, Seoul, Republic of Korea dekenai, sikuli ta ena biaguna ia gwau natudia dekenai kara namodia hadibaia karana be gau badana. Ia gwau: “Kara namodia oi hadibaia guna, murinai diba do oi hadibaia.”
Idia ura edia natuna be koledi dekenai ia vareai bona mauri lalonai do ia kwalimu tama sina momo be sisiba herevadia idia kamonai lasi. Bema oi be tama o sina ta, emu natuna ia bada neganai, oi ura ia be edena bamona tauna ai do ia lao? Kara maoro taravatudia ia badinaia bona hemataurai ia hahedinaraia tauna, a? Ia be ma haida edia namo ia laloa, ena kara ia haidaua diba bona gau namodia sibona ia laloa tauna, a? Bema oibe, mani hereva gabena oi laloa.