Duahia Taudia Edia Henanadai

Ita gwau diba Davida bona ena tatau ese paraoa helagana idia ania, ena anina be nega aukadia lalonai Dirava ena taravatu utua karana ese panisi do ia mailaia lasi, a?—​1 Samuela 21:​1-6.

Levitiko 24:​5-9 ia hereva bamona, Sabati ta ta dekenai idia kokia paraoa helaga gunadia be hahelaga taudia ese do idia ania totona. Unai hakaua herevana ena anina be unai paraoa be helaga bona idia atoa siri Dirava ena hesiai gaukara idia karaia taudia totona—​hahelaga taudia ese do idia ania. Gaukara idauna idia karaia taudia dekenai eiava moale karana ta dekenai idia ania be kerere. To, hahelaga tauna, Ahimeleka ese paraoa helagana be Davida bona ena tatau dekenai ia henia idia ania neganai, unai be kerere lasi.

Reana Davida be King Saulo amo mai anina bada gaukarana ta ia karaia. Davida bona ena tatau be idia hitolo bada. Ahimeleka ia hamomokania Davida bona ena tatau be idia goeva. Idia be unai paraoa helagana idia ania neganai taravatu idia utua, to taravatu ese ia gwauraia paraoa gaukaralaia dalana idia utua lasi. Unai dainai Ahimeleka ese gwaumaoro ia henia unai paraoa idia ania totona. Iesu Keriso ese Davida bona ena tatau edia haheitalai ia gaukaralaia Farisea taudia ia hamaorodia sabati taravatu aukadia idia karaia be maoro lasi.​—Mataio 12:​1-8.

To, ita herevalaia vadaeni sivaraina be ia hahedinaraia lasi, nega aukadia lalonai Dirava ena Taravatu ita utua be maoro. Lasi. Hegeregere, Israela ena tuari taudia ese Pilistia taudia idia heatu henia neganai, hekwakwanai badana ta ia vara. King Saulo ia gwau: “Tau ta do ia aniani lasi ela bona dina ia diho, bona lau dekenai idia tuari henia taudia edia kerere davana do lau henia. Do ia aniani tauna be do ia dika.” Baibel ia gwau: “Unai dina dekenai Israela taudia ese Pilistia taudia idia halusia.” Unai tuari taudia be idia hitolo dainai idia manoka momokani bona ‘idia abia mauri gaudia idia alaia mase bona mai rara danu idia ania.’ (1 Samuela 14:​24, 31-33) Idia be rara ena taravatu idia utua karana amo Iehova vairanai idia kara dika. Edia kara be Dirava ia ura rara idia gaukaralaia dalana, “kara dika davana ia karaia” gauna ida ia hegeregere lasi. (Levitiko 17:​10-​12; Genese 9:​3, 4) Edia kara dika dainai, boubou gaudia idia henia neganai, Iehova be mai hebogahisi ida edia boubou gaudia ia abia dae.—​1 Samuela 14:​34, 35.

Oibe, Iehova ia ura nega ibounai iena taravatu ita badinaia. Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia.”—​1 Ioane 5:​3.

[Picture on page 3]

Sabati dinadia ta ta ai palai dubu lalonai paraoa helaga matamatadia idia atoa