Dirava Ena Hereva Ia Lalokau Henia—Manau Africa Tauna
NEGA momo, Africa dekenai idia vadivadi taudia idia hoa, badina idia itaia Baibel ena hereva badadia be hanua taudia ida idia herevalaia diba. Taunimanima idia kamonai totona, inai henanadai be namo herea: “Dirava ena Basileia be dahaka?” eiava “Hekwakwanai haida, hegeregere hitolo, gorere, tuari, bona taravatu utua karana haorea dalana ta ia noho, a?” Momo be mai moale ida dala idia kehoa, idau tauna ese Baibel lalonai haere ia hahedinaraia totona. Nega momo, unai bamona dala amo Baibel stadi idia hamatamaia. Bona stiuden taudia be lauma dalanai idia goada idia lao neganai, bapatiso Keristani taudia ai idia lao.
Unai bamona ia karaia Africa tauna ginigunana ena sivarai be Baibel bukana Kara 8:26-40 ese ia herevalaia. Ia be Etiopia tauna, bona Ierusalema dekenai ia lao, Dirava momokanina, Iehova, ia tomadiho henia totona.
Henunai ia noho laulauna ese ia hahedinaraia hegeregerena, Etiopia tauna be ena kariota amo ena noho gabuna ia lao henia, bona lokua toretorena ia duahia noho. Idau tauna ta be unai Etiopia tauna dekenai ia lao bona ia nanadaia: “Oi diba dahaka oi duahia, a?” Manau Etiopia tauna ia hahedinaraia heduru ia abia be namo, bona idau tauna, Keristani haroro tauna Filipo ia noia kariota dekenai ia guia totona. Bena Filipo ia noia Buka Helaga lalonai ia duahia sivaraina ena anina ia gwauraia hedinarai totona. Filipo ia gwau ia be peroveta herevana ta, Mesia Iesu Keriso ena mase ia herevalaia. Danu, Filipo be “Iesu ena Sivarai Namona” ma haida, Iesu ena toreisi lou danu, ia herevalaia.
Etiopia tauna be unai hereva momokanidia ia kamonai neganai, ia ura Iesu ena hahediba tauna ai ia lao bona ia henanadai: “Dahaka ese egu bapatiso ia koua?” Unai manau Africa tauna be ia bapatiso murinai, mai moale ida ena ruma dekenai ia giroa lou, bona iena sivarai be Baibel ese ia gwauraia lou lasi.
Hari, tanobada hegegemadai Iehova ena Witnes taudia be taunimanima milioni momo idia durua, unai “sivarai namona” idia dibaia totona. Hari, idia ese davana lasi Baibel stadi milioni siks bamona idia karaia noho.