Duahia Taudia Edia Henanadai

Hahediba taudia idia kamonai Petero be iduara dekenai ia gini neganai, dahaka dainai idia gwau: “Sedira inai be iena aneru”?​—⁠Kara 12:⁠15.

Hahediba taudia idia laloa kerere, idia laloa Petero ena hereva ia gwauraia totona ia mai aneruna, be geiti dekenai ia gini. Mani unai siri badinai idia noho siri edia hereva ita itaia.

Iamesi ia hamasea tauna, Heroda, ese Petero ia dogoatao. Unai dainai hahediba taudia idia laloa Heroda ese Petero danu do ia hamasea. Seini amo ena imana idia kwatua, bona dibura ai Petero be tuari taudia edia orea foa, orea ta ta lalonai be taunimanima foa, ese nega idauidau foa ai idia gimaia. Bena, hanuaboi ta ai hoa dalanai aneru ta ese ia ruhaia bona dibura rumana amo ia hakaua raka-lasi. Gabeai Petero be ia vara gauna ia lalopararalaia neganai, ia gwau: “Hari lau diba momokani, Lohiabada ese iena aneru ia siaia, Heroda ena imana dekena amo, . . . lau ia hamauria vadaeni.”​—⁠Kara 12:​1-11.

Gabeai Petero be Ioane Mareko ena sinana, Maria, ena ruma dekenai ia lao, unuseniai hahediba taudia idia hebou. Petero be iduara dekenai ia pidipidi neganai, hesiai kekenina ladana Roda ese iduara ia kehoa. Petero ena gadona ia kamonai neganai, ia diba unai be Petero, unai dainai ia heau lao ma haida ia hamaoroa totona! Matamanai, hahediba taudia idia abia dae lasi Petero be iduara dekenai ia gini. Idia laloa kerere, idia gwau: “Sedira inai be iena aneru.”​—⁠Kara 12:​12-15.

Hahediba taudia idia laloa Heroda ese Petero ia hamasea vadaeni bona ena lauma be iduara dekenai ia gini, a? Lasi, unai bamona idia laloa lasi, badina Iesu ena murinai idia raka taudia be Baibel ena hereva momokani mase taudia dekenai idia diba​—⁠“mase taudia be gau ta idia diba lasi.” (Hadibaia Tauna 9:​5, 10) Vadaeni, hahediba taudia ese inai hereva, “Sedira inai be iena aneru” idia gwauraia neganai, edia hereva ena anina be dahaka?

Iesu ena hahediba taudia idia diba, idaunegai aneru ese Dirava ena taunimanima idia durudia. Hegeregere, Iakobo ese ia “ia hamauria vadaeni aneru” ia herevalaia. (Genese 48:16) Bona Iesu ese idia huanai ia noho natuna ta ia herevalaia neganai, iena murinai idia raka taudia ia hamaoroa: “Umui naria namonamo, inai bamona mero maragi ta do umui ura lasi, o lulua garina. Badina be umui lau hamaoroa, guba dekenai inai maragidia idia naria anerudia be hanaihanai lauegu Tamana ena vairana idia itaia noho.”​—⁠Mataio 18:⁠10.

Buka ta (Young’s Literal Translation of the Holy Bible) ese inai hereva agʹge·los (aneru) ia hahanaia “hereva gwauraia tauna.” Toana be unai negai Iuda taudia idia abia dae Dirava ena hesiai taudia ta ta be mai edia aneru ta ta​—⁠idia gwauraia gimaia aneru. To momokani, unai lalohadai be Baibel lalonai ia noho lasi. To, hahediba taudia ese inai hereva “sedira inai be iena aneru” idia gwauraia neganai, idia laloa Petero ena hereva ia gwauraia totona ia mai aneruna, be iduara dekenai ia gini.