Guba Ena Toana Ia Hereaia Gauna

GABU ibounai dekenai taunimanima be guba ena toana idia gwauraia diba. Adorahi neganai bema guba ia kakakaka, bouti ai idia gaukara taudia idia moale. Daba kahanai bema guba ia kakakaka, bouti ai idia gaukara taudia idia gima be namo. Hari guba ena toana idia stadilaia taudia ese guba ena toana ia idau ena badina idia gwauraia.

Iesu ena negai, taunimanima be guba ena toana idia gwauraia diba danu. Iesu be Iuda taudia haida dekenai ia gwau: “Adorahi neganai umui gwau, ‘Kerukeru be nega do ia namo, badina be guba ia kakakaka vadaeni.’ Ma dabai umui gwau, ‘Hari dina be medu do ia diho, badina be guba be kakakaka bona ia korema danu.’ Be, guba ena toana umui diba, to hari nega ena toana be umui diba lasi, a?”​​—⁠Mataio 16:​2, 3.

Unai “nega ena toana” haida be dahaka? Gau momo ese idia hamomokania, Iesu be Dirava ese ia siaia Mesia korikorina. Guba ena toana ia idau neganai, taunimanima momo ese idia itaia hegeregerena, Iesu ena kara danu be momo ese idia itaia. Ena be Iuda taudia momo be Mesia ia mai ena toana idia itaia, to unai idia laloa bada lasi, unai toa be guba ena toana ia idau karana ia hereaia.

Hari inai negai, guba ena toana ia hereaia gauna ma ta ita lalopararalaia danu be gau badana. Iesu ia peroveta, inai tanobada dikana idia hadikaia ore murinai, tanobada matamatana do ia vara. Unai ia do vara lasi lalonai, ia gwau gau haida do idia vara guna. Hegeregere, tanobada hegegemadai tuari bona hitolo bada do idia vara. Ia gwau danu, bema unai gaudia umui itaia, vadaeni do umui diba Dirava ese gau ta do ia karaia negana be ia kahirakahira.​​—⁠Mataio 24:​3-​21.

Inai “nega ena toana” oi itaia, a?