Iseda Malana be mai Ena Siahu
JIRAF ena malana ena lata be 45 sentimita bona ia hagiroa haraga diba, bona malana be mai ena goada au amo rau ia kokia totona. Lakaradonodono ena malana ena metau be elefant tamona ena metau bamona. Mani oi laloa, lakaradonodono be mai ena goada ida ena malana ia hamarerea!
Taunimanima edia malana ena bada, metau, bona goada be unai animal rua edia malana bamona lasi. To, ena siahu be bada. Baibel ese taunimanima ena malana ia herevalaia neganai, ia gwau: “Oiemu hereva ese mauri ia henia diba, bona mase ia mailaia diba.” (Aonega Herevadia 18:21) Momokani, nega momo ita kamonai taunimanima edia koikoi herevadia dainai, kerere lasi taudia edia mauri idia hadikaia eiava idia hamasedia.
Unai hegeregerena, haida be nega daudau idia hetura heheni, to badu herevadia dainai edia hetura karana ia dika. Ta ena hereva aukadia ese ma ta ia hahisia diba. Iobu be ena turana ese idia gwauraia dika neganai, Iobu be mai taitai ida ia gwau: “Emui hereva dekena amo, badina dahaka lau umui hisihisi henia noho?” (Iobu 19:2) Hahediba tauna Iamesi ese ita biagua lasi malana ena siahu be inai bamona ia herevalaia: “Mala be gau maragina, to ia be hekokoroku momo. Lahi danu umui laloa. Lahi maragina ese uda bada herea ia araia ore diba. Bona mala be lahi bamona.”—Iamesi 3:5, 6.
To danu iseda malana o hereva be mai ena siahu, ta ita durua ia mauri totona. Haida be heduru bona hagoadaia herevadia idia abia dainai, idia lalometau lasi bona sibona idia hamasea lasi. Drag idia gaukaralaia kerere taudia bona raskol taudia momo be haida edia heduru hereva namodia idia kamonai bona edia kara dika idia rakatania neganai, edia mauri ia namo. Momokani, kara maoromaoro tauna ena hereva be “mauri idia havaraia noho,” bona “nega korikori ai idia gwauraia herevana be golo apolodia siliva herahera gaudia latanai idia noho bamona.”—Aonega Herevadia 15:4; 25:11, NW.
To, iseda malana ita gaukaralaia namonamo daladia be inai: Iehova Dirava ita hanamoa, ena Basileia ena sivarai namona ita harorolaia, bona Baibel ena hereva momokani be ma haida dekenai ita hadibaia. Dahaka dainai? Iesu ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”—Ioane 17:3; Mataio 24:14; 28:19, 20.