“Hereva Momokani Be Dahaka?”

ROMA ena gavana Pontio Pilato ese hemataurai lasi dalanai unai henanadai be Iesu dekenai ia gwauraia. Pilato ia ura lasi Iesu ena haere ia kamonai, bona Iesu ese haere ta ia henia lasi. Reana, Pilato be hereva momokani ena anina ia lalopararalaia lasi.​​—⁠Ioane 18:⁠38.

Hari inai negai, taunimanima momo hegeregere tomadiho gunalaia taudia, tisa taudia, bona politikol taudia idia ura lasi hereva momokani idia diba. Idia laloa hereva momokani​​—⁠kara maoromaoro badinaia karana bona tomadiho daladia​​—⁠be hanaihanai idia idau. Unai ese ia hahedinaraia, taunimanima be sibodia abia hidi idia karaia diba dahaka be maoro bona dahaka be kerere. (Isaia 5:​20, 21) Danu idia laloa taunimanima ese guna idia badinaia kara maoromaoro taravatudia be anina lasi bona idia dadaraia.

Iesu ese mai anina bada herevana ta ia gwauraia dainai, Pilato be unai henanadai ia henia. Iesu ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioane 18:37) Iesu dekenai hereva momokani be ia hedinarai goevagoeva bona ia lalopararalaia. Iena hahediba taudia dekenai gwauhamata ia karaia: “Hereva momokani be do umui diba, bona hereva momokani ese umui do ia ruhaia.”​​—⁠Ioane 8:​32.

Hereva momokani be edeseni ita davaria diba? Iesu be Dirava ia guriguri henia neganai, ia gwau: “Oiemu hereva be hereva momokani.” (Ioane 17:17) Baibel be Dirava ena lauma helaga amo idia torea bukana, bona ia ese hereva momokani ia hahedinaraia. Unai hereva momokani ese ita ia hakaua, bona nega vaira totona helaro namona ia henia​​—⁠unai helaro be mauri hanaihanai.​​—⁠2 Timoteo 3:​15-​17.

Pilato be ia ura lasi hereva momokani ia dibaia. To, bema oi dekenai ta ese hereva momokani ia hahedinaraia, dahaka do oi karaia? Mani, Iehova ena Witnes taudia oi nanadaia Iesu ese ia gwauraia “hereva momokani” be oi dekenai do idia hadibaia totona. Mai moale ida hereva momokani be oi dekenai do idia hadibaia.