“Natudia be mai Edia Maoro Edia Abidadama Idia Hagoadaia Totona”

DECEMBER 9, 2008 ai, orea ta (Swedish Academy for the Rights of the Child) be hebou ta idia karaia, ena sinado be “Natudia be mai Edia Maoro Edia Abidadama Idia Hagoadaia Totona” (eiava “The Child’s Right to Spiritual Development”). Sweden ena dubu taudia, Islam, Kerisendom ena tomadiho ma haida, bona taunimanima edia kara idia laloa bada oreadia edia hereva henia taudia ese unai sinado dekenai edia lalohadai idauidau idia gwauraia hedinarai.

Unai hereva henia taudia huanai, pris tauna ta ia gwau: “Baibel ena sivarai ese natudia ia durua edia abidadama idia hagoadaia totona, be ta ese ia herevalaia namonamo be auka.” Baibel ena siri idauidau ese edena dala ai natudia ia durua edia abidadama idia hagoadaia totona?

Unai pris tauna ia gwau: “Baibel ai idia noho herevadia o sivaraidia ese dala ia kehoa natudia be sibodia idia duahia gaudia idia lalohadailaia totona.” Ia gwau, “Adamu bona Heva, Kaino bona Abela, Davida bona Goliata, Iesu ena vara, takisi gogoa tauna Sakaio, boio merona ena parabole, bona Samaria tauna edia sivarai” be “sivarai namodia haida, unai ese [natuna ta] ena laloa dalana ia durua koikoi karana, ta ena dika gwauatao karana, sori hereva gwauraia karana, ta inai henia karana, ta hadikaia karana, dika hamaoromaoroa karana, bona tadikaka lalokau henia karana ia lalohadailaia totona.” Ma ia gwau: “Unai sivarai be ta ese ena mauri lalonai ia badinaia be mai anina bada.”

Unai dainai, namona be natudia ita hagoadaia Baibel idia duahia totona. To, natudia be idia hegeregere momokani Baibel ai “sibodia idia duahia gaudia idia lalohadailaia” bena lalohadai maorona idia abia, a?

To taunimanima badadia danu idia ura haida ese idia dekenai Baibel ena sivarai edia anina idia herevalaia namonamo. Hegeregere, Baibel be tau ta ena sivarai ia gwauraia, ia be Baibel ai ‘sibona ia duahia gaudia ia lalohadailaia,’ to edia anina ia lalopararalaia namonamo lasi. Unai be Etiopia tauna. Ia be Isaia ena peroveta herevana ia duahia to ena anina ia lalopararalaia lasi. Ia ura peroveta herevana ena anina ia lalopararalaia, unai dainai hahediba tauna Filipo ese unai peroveta herevana ena anina ia herevalaia neganai, mai ena ura ida ia abia dae. (Kara 8:​26-​40) Unai Etiopia tauna sibona lasi. Ita ibounai​​—⁠natudia danu⁠​—⁠​ita ura haida ese ita dekenai Baibel ena sivarai idia herevalaia namonamo.

Baibel be ita ia hadibaia: “Natuna maragidia ibounai ese kavakava idia karaia noho.” (Aon. 22:15) To, natudia ese dala maorona idia diba totona, edia tama sina edia maduna badana be inai: Baibel bona kongrigeisen ese idia hadibaia gaudia amo taravatu maoromaorodia be edia natudia dekenai idia hadibaia be namo. Natudia ese unai diba idia abia be maoro. Idia do maragi neganai, namona be tama sina ese idia durua Baibel ena hereva amo edia abidadama idia hagoadaia totona, unai amo idia be “lo taudia . . . idia edia lalona idia manada vadaeni, namo bona dika edia toana idia diba namonamo.”​​—⁠Heb. 5:​14, BHğ.