Dirava Kahirakahira Oi lao

“Oiemu Basileia be Do Ia Gini”

2 Samuela 7:​1-​16

TAUNIMANIMA edia histori lalonai, tanobada ena lohia taudia momo be edia dagi amo idia kokia. Haida be vouti karana amo idia kokia, to ma haida be idia doria edia dagi idia rakatania totona. To, Dirava ena guba Basileia ena King, Iesu Keriso be edena bamona? Gau ta ese Iesu do ia koua Dirava ese ia henia King dagina ia abia lasi totona, a? Unai henanadai ena haere be Iehova ese Israela ena King Davida dekenai ia gwauraia herevana amo do ita abia, unai hereva be 2 Samuela karoa 7 ai ia noho.

Samuela Iharuana karoa 7 matamana ai, ita itaia Davida be ia hemarai, badina ia be taunimanima ta sibona bona ruma hairaina ta lalonai ia noho, to Dirava ena taravatu mauana be palai rumana lalonai idia atoa.a Davida ese ia hahedinaraia ia ura Iehova totona ruma namona ta o dubu helagana do ia haginia. (Siri 2) To, Davida ese Dirava ena dubu helaga do ia haginia lasi. Iehova be peroveta tauna Natana amo Davida ia hamaoroa, iena natuna mero ta ese dubu helaga do ia haginia.​—Siri 4, 5, 12, 13.

Davida be mai kudouna ibounai ida ia ura unai dubu helaga do ia haginia, unai dainai Iehova ia moale. Davida ena abidadama karana dainai bona peroveta herevana hegeregerena, Dirava be Davida ida gwauhamata ta ia karaia. Ia gwau Davida ena lohia besena amo ta do ia abia hidi bona do ia lohia ela bona hanaihanai. Natana ese Dirava ena gwauhamata be Davida dekenai ia gwauraia: “Oiemu iduhu bona oiemu basileia be do ia gini ela bona hanaihanai, lau dainai. Bona oiemu king dagi do ia noho hanaihanai.” (Siri 16) Unai gwauhamata lalonai daika be unai King dagina do ia abia bona do ia lohia ela bona hanaihanai?​—⁠Salamo 89:​20, 29, 34-​36.

Nasareta tauna Iesu be Davida ena tubuna ta. Aneru ta ese Iesu ena vara ia gwauraia neganai, ia gwau: “Lohiabada Dirava ese iena tamana Davida ena King dagina do ia henia. Bona ia be Iakobo ena bese edia King do ia lao, ela bona hanaihanai. Iena basileia be do ia doko lasi.” (Luka 1:​32, 33) Dirava ese Davida dekenai ia gwauraia gwauhamatana be Iesu Keriso dekenai ia guguru. Oibe, Iesu be taunimanima ese idia voutia dainai do ia lohia lasi, to Dirava ena gwauhamata hegeregerena do ia lohia ela bona hanaihanai. Namona be ita laloatao Dirava ena gwauhamata ibounai be nega ibounai idia guguru momokani.​—⁠Isaia 55:​10, 11.

Samuela Iharuana karoa 7 amo mai anina bada gaudia rua ita dibaia. Ginigunana be, ita diba momokani gau ta o tau ta ese Iesu Keriso ena lohia dalana ia koua diba lasi. Unai dainai, ita diba momokani Iesu be ia lohia ena badina do ia hagugurua, bona unai be Dirava ena ura tanobada ai do ia karaia guba ai ia karaia bamona.​​—⁠Mataio 6:​9, 10.

Iharuana be, unai sivarai amo Iehova ena kara namo ita dibaia. Ita laloatao Iehova be Davida ena ura ia itaia bona ia laloa bada. Ita moale badina ita diba Iehova ese ia ita tomadiho karana ia abia dae momokani. Nega haida ita gorere o buruka dainai, Dirava ena hesiai gaukara ita hagugurua diba lasi. Bema ita be unai bamona, namona be ita diba Iehova be ia ita tomadiho henia karana ia laloa bada. Unai ese ita do ia hagoadaia be namo.

[Footnote]