Ladana ta Engadine Valley Ai

ST. MORITZ. Inai ladana be guna oi kamonai vadaeni, a? St. Moritz be Switzerland ena gabu ta ladana Engadine Valley ai ia noho, ia be Switzerland bona Italy edia boda badinai. Taunimanima momo be unuseniai holide totona idia lao badina ia be gabu hairaina, bona ena ororo badadia be sinou ese ia koudia. Danu, Engadine Valley ai Swiss National Park ia noho. Unuseniai tubutubu gaudia bona animal idauidau edia hairai ese iseda Havaraia Tauna, Iehova idia hanamoa. (Sal. 148:​7-10) To unai sibona lasi, lagani 1650 lalodiai taunimanima ese idia karaia gaudia haida idia noho danu.

Ruma ena vairana kahanai idia torea herevadia ese emu matana do ia veria. Lagani handred momo gunanai, vaia taunimanima be edia ruma idia hahairaia totona, hereva haida be ruma ena vairana kahanai idia torea. Hegeregere, Dirava ena ladana be ruma ena iduara ena atai kahanai idia torea. Laulau dekenai oi itaia rumana ta be Bever hanuana ai, bona idia torea herevana be inai: “Lagani 1715. Iehova be matamana bona Iehova be dokona. Iena heduru dainai gau ibounai ita hagugurua diba. Bema ia be lasi, gau ta ita hagugurua diba lasi.” Oibe, Dirava ena ladana be nega rua idia torea.

Laulau ai ia noho toretore ma ta be Madulain hanuana ena ruma ta ai, bona idia torea herevana be inai: “Salamo 127. Bema Iehova ese ruma ia haginia lasi neganai, unai ruma idia haginia taudia be idia hekwarahi kava. Lucius Rumedius. Lagani 1654.”

Dahaka dainai Engadine Valley ai taunimanima ese Iehova ena ladana be edia ruma ai idia torea? Lagani 1500 lalodiai, taunimanima momo be Katolik dubu idia rakatania neganai, Engadine taudia edia Romansh gado ai Baibel ta idia halasia. Unai be Romansh gado ai idia torea buka ginigunana. Taunimanima ese Dirava ena Hereva idia duahia neganai, edia kudouna ia hamarerea dainai, edia ruma dekenai edia ladana sibona idia torea lasi, to Baibel ena hereva haida bona Dirava ena ladana idia torea danu.

Oibe, unai nega amo ema bona hari, unai toretore ese Iehova ena ladana idia harorolaia bona hanamoa noho. Mai moale ida unai gabu ai idia noho taudia bona vadivadi taudia ai boiridia Iehova ena ladana ia noho rumana ta dekenai idia mai totona. Bever dekenai Iehova ena Witnes Taudia edia Kingdom Hall ta ia noho, bona unuseniai lalokau Diravana, Iehova, idia dibaia diba.

[Picture Credit Line on page 7]

© Stähli Rolf A/age fotostock