“Ia Namo Emai Piksa Oi Abia?”
Josué be Mexico Betele ai ia gaukara tadikaka ta. Distrik hebouhebou ena dina iharuana murinai, ia be Querétaro siti dekenai ia loaloa neganai, Colombia amo idia mai tau bona hahine, Javier bona Maru, ese idia noia edia piksa ia abia totona. Josué bona ena Witnes turadia be dabua namodia idia hahedokilaia bona edia lapel kadi idia karaia dainai, unai tau bona hahine idia ura diba bema idia be gradueisen ta o hebou badana ta amo idia mai. Josué ese ia hamaorodia Iehova ena Witnes taudia be hebou badana ta idia abia bona idia ruaosi ia boiria Sunday ena program idia lao totona.
Javier bona Maru idia gwau idia dekenai dabua namodia be lasi dainai, idia hemarai unai hebou idia lao totona. Ena be reana idia ura lasi unai hebou idia lao, to Josué ese ena ladana bona brens opesi ena telefon namba ia henidia.
To hua foa murinai, Javier ese Josué ia rini henia bona ia hamaoroa idia be unai hebouhebou dekenai idia lao, bona idia ura edia noho gabuna Mexico City ai, Iehova ena Witnes taudia ese do idia vadivadi henidia. Unai murinai, Javier bona Maru be Baibel idia stadilaia bona hebou idia lao matamaia. Hua ten murinai bapatiso lasi pablisa ai idia lao. Ena be Canada dekenai idia lao, to idia goada idia lao bona idia bapatiso.
Gabeai, Javier ese revareva ta amo Josué dekenai hereva momokani ia abia dae ena badina ia herevalaia. Ia gwau: “Lau bona egu adavana be hebouhebou ai do lao lasi neganai, ai laloparara emai mauri lalonai Dirava ese ai ia hakaua be gau badana. Bona oi ai itaia neganai, emu dabua ena toana namona amo ai diba oi be reana mai anina bada hebouna ta dekenai oi lao. Danu, hebouhebou ai moalelaia badina ta ese emai helai gabuna dekenai ai ia hakaua lao, emai badinai idia helai taudia be ai idia durua Baibel siri ai kehoa totona, bona hebou taudia edia kara be namo herea. Ena be ai be dabua maorona ai hahedokilaia lasi, to unai idia laloa lasi.”
Josué be King Solomona ena hereva ia hamomokania! Solomona ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” (Had. 11:6) Oi be ma haida oi boiria vadaeni do ita abia hebouhebou o pablik tok dekenai idia mai totona, a? Javier bona Maru bamona, Iehova ese oi ia gaukaralaia diba ena hereva totona idia hitolo bona ranu mase taudia oi boiria totona.—Isa. 55:1.
[Picture on page 32]
Laurina ia lao idibana: Alejandro Voeguelin, Maru Pineda, Alejandro Pineda, Javier Pineda, bona Josué Ramírez, Mexico brens dekenai