“Oi ese . . . Natudia Maragidia Dekenai Oi Hahedinaraia”

Dirava ena sivarai momokanina oi ura diba, a? Ia be daika? Dahaka ia ura henia bona dahaka ia inai henia? Iehova Dirava ese iena sivarai momokanina be ena Hereva, Baibel, lalonai ia hahedinaraia. To Baibel idia duahia taudia ibounai ese hereva momokani idia lalopararalaia diba lasi. Dahaka dainai? Badina hereva momokani lalopararalaia karana be hahenamo ta, bona haida sibona ese unai hahenamo idia abia. Iesu ese unai ia herevalaia dalana mani ita itaia.​—Mataio 11:25 duahia.

Unai siri be inai bamona ia matamaia: “Unai nega ai Iesu ia haere ia gwau.” Iesu be ia vara vadaeni gauna ta dainai ia ura haere ia henia. Ia ese Galilea ena siti toi ai idia noho taudia ia gwau henidia, idia be iena siahu karadia idia itaia, to idia ura lasi iena hahediba taudia ai idia lao. (Mataio 11:20-24) Reana do oi gwau, ‘Dahaka dainai Iesu ena hoa karadia idia itaia taudia be iena hadibaia hereva idia abia dae lasi?’ Badina unai taudia edia kudouna ia auka.​—Mataio 13:10-15.

Iesu ia diba Baibel ai Dirava ena sivarai momokanina ita lalopararalaia totona, namona be (1) Dirava ena heduru ita abia bona (2) lalohadai maorona ita abia. Iesu ia gwau: “Tamagu, guba bona tanobada edia Lohiabada e, taunimanima vairanai oi lau hanamoa, badina oi ese inai gaudia be aonega bona diba bada taudia amo oi hunia, to natudia maragidia dekenai oi hahedinaraia.” Oi abia dae Baibel ena hereva momokani lalopararalaia karana be hahenamo ta, a? Iehova be “guba bona tanobada edia Lohiabada” dainai, ia be mai ena maoro ta dekenai hereva momokani ia hunia o hahedinaraia. To, Dirava be taunimanima edia toana ia laloa lasi dainai, dala ia noho ibounai ese hereva momokani idia lalopararalaia totona. Dahaka dainai haida sibona dekenai hereva momokani ia hahedinaraia, to haida dekena amo ia hunia?

Iehova be manau taudia ia lalonamo henia to hekokoroku taudia ia inai henia. (Iamesi 4:6) Ia ese ‘aonega bona diba bada taudia’ amo hereva momokani ia hunia, badina edia aonega dainai idia hekokoroku bona Dirava amo heduru idia tahua lasi. (1 Korinto 1:19-21) To Dirava ese “natudia maragidia”​—⁠mai manau ida ena heduru idia tahua kudou-maoro taudia​—dekenai hereva momokani ia hahedinaraia. (Mataio 18: 1-4; 1 Korinto 1:26-28) Dirava ena Natuna, Iesu, be unai bamona taudia edia kara ia diba. Hekokoroku bona diba bada tomadiho gunalaia taudia momo be Iesu ena hadibaia herevadia idia lalopararalaia lasi, to manau haoda taudia ese unai hadibaia herevadia idia lalopararalaia. (Mataio 4:18-22; 23:1-5; Kara 4:13) Unai negai, mai edia kohu momo bona edukeisen namona idia abia taudia haida be manau karana idia hahedinaraia bona Iesu ena hahediba taudia ai idia lao.​—Luka 19:1, 2, 8; Kara 22:1-3.

Paragraf ginigunana ai ia noho henanadai mani ita laloa lou: Dirava ena sivarai momokanina oi ura diba, a? Bema oibe, reana do oi moale badina Dirava be sibona idia gwauraia aonega bada taudia ia ura henia lasi, to unai bamona taudia ese idia laloa maragi taudia ia ura henidia. Baibel oi stadilaia neganai, oi manau bona lalohadai maorona oi abia, Iehova ese oi dekenai harihari gauna namona, Iena sivarai momokanina lalopararalaia karana unai, do ia henia. Hereva momokani oi lalopararalaia neganai, do oi moale hari bona vaira negai “mauri korikorina,” mauri hanaihanai unai, do oi abia. Unai be Dirava ese ia gwauhamatalaia tanobada matamatana dekenai, unuseniai kara maoromaoro taudia sibona do idia noho.a​—1 Timoteo 6:12, 19; 2 Petero 3:13.