INAI OI DIBA, A?

Lagani 70 C.E. murinai Ierusalema ena dubu helaga idia haginia lou, a?

IESU ia gwau, Iehova ena dubu helaga ena nadi ta be nadi ta latanai do ia noho lasi. Lagani 70 C.E. ai, Titus ese ia gunalaia Roma ami ese Ierusalema ia hadikaia neganai, unai peroveta herevana ia guguru. (Mat 24:2) Gabeai, Roma ena King, Julian be palani ia karaia unai dubu helaga ia haginia lou totona.

Momo idia gwau Dirava korikorina ia diba lasi tauna, Julian be Roma ena King ginigabena. Ia be Constantine Badana ena vavana, bona iena negai ia idia hadibaia taudia be sibona idia gwauraia Keristani taudia. To, lagani 361 C.E. ai king ai ia lao neganai, ia idia hadibaia herevadia ia dadaraia. Unai dainai, histori bukadia ese Julian idia gwauraia Aposteit tauna.

Julian ese sibodia idia gwauraia Keristani taudia ia inai henia. Reana ena badina ta be, ena mauri lagani be 6 neganai, ia itaia sibodia idia gwauraia Keristani taudia haida ese ena tamana bona varavara haida idia hamasedia. Dubu edia histori torea taudia idia gwau, Julian ese Iuda taudia ia hagoadaia edia dubu helaga idia haginia lou totona. Ia laloa, unai ese do ia hamomokania Iesu be peroveta koikoi tauna.a

Ita gwau diba, Julian ia ura dubu helaga ia haginia lou. To, ita diba lasi bema unai haginia lou gaukarana ia hamatamaia eiava lasi. Bona bema unai gaukara ia hamatamaia, ita diba lasi dahaka dainai ia hagugurua lasi. To ita diba gauna be inai, Julian be kahirakahira lagani rua ia lohia murinai, idia hamasea. Unai dainai dubu helaga haginia lou gaukarana be reana ia vara lasi.