Hamatamaia Herevadia Ruma Taudia Edia Lalona Veria Totona
1 Ruma ta ruma ta dekenai oi haroro neganai, oiemu hereva ibounai amo edena hereva be mai anina bada? Reana ita ibounai do ita gwau hamatamaia herevana be mai anina bada. Bema sekeni 30 bamona lalonai oi ese ruma tauna ena lalona oi veria diba lasi, ia ese oiemu hereva do ia koua.
2 Hamatamaia hereva namona oi hegaegaelaia neganai, dahaka gaudia do oi laloa be namo?
◼ Namona be do oi davaria taudia edia kastom bona idia tahua gaudia oi lalodia guna. Idia ura vadivadi taudia ese hereva haida idia gwauraia guna ruma taudia edia lalona hanamoa totona, bena gabeai edia ura gauna idia herevalaia, eiava idia ura unai vadivadi taudia idia mai ena badina idia gwauraia hedinarai haraga? Oi noholaia gabuna dekenai headava matamata taudia momo idia noho, a? Dahaka gaudia dainai idia lalo-hekwarahi? Oi noholaia gabuna dekenai taunimanima be tanobada taudia ibounai idia davaria hekwakwanaidia idia diba, a? Bema oibe, reana inai bamona hereva amo edia lalona oi veria diba: “Daba namona. Lauegu ladana be __________ . Taunimanima be idia hitolo mase bona tuari dekenai idia mase sivaraidia lau kamonai neganai, lau lalohisihisi bada. Oi danu be unai bamona, a?” Idia danu kiki noho totona reana inai henanadai oi henidia diba: “Tanobada dekenai idia vara hekwakwanaidia haoredia dalana be dahaka?” “Bema pavapava ta ese Isaia 9:6, 7 ena hereva ia karaia diba unai be namo momokani, ani?” Bena unai siri oi duahia diba bona ena anina oi gwauraia diba.
3 Teritori haida dekenai, taunimanima be edia ruma bona edia ruma bese idia lalodia bada, idia be tanobada ibounai ena maino karaia sivaraidia idia laloa bada lasi.
Bema unai bamona, edia lalona veria totona reana inai bamona oi hereva diba:
◼ “Lagani 10 do idia ore murinai oi laloa oi bona oiemu ruma bese taudia edia mauri be edena bamona? Bible lalonai peroveta herevana ia gwau gabeai pavapava ta do ia mai bona kara maoromaoro amo do ia lohia; unai be moale gauna ta. Isaia 9:6, 7 ia herevalaia inai bamona, mani oi kamonai.”
4 Oi noholaia gabuna dekenai raskol bona dagedage karadia idia herevalaia momo, a? Bema Reasoning buka, rau 10 ena hereva badana “Crime/Safety” (“Taravatu Utua Karadia/Noho Namo”) henunai idia torea hamatamaia hereva ginigunana oi gaukaralaia, reana taunimanima haida edia lalona oi veria diba.
Oi gwau diba:
◼ “Namo. Do ita noho namo dalana be taunimanima ida ai herevalaia. Raskol karadia bona taravatu utua karadia ma haida be bada, bona unai ese iseda noho ia hadikaia, ani?” Bena inai bamona henanadai ta oi henia diba. “Oi laloa hamaoromaoroa dalana be dahaka?” eiava “Oi laloa unai hekwakwanai kokia dalana be ta ia diba, a?” Bena reana ruma tauna do ia haere. Murinai, Isaia 9:6, 7 oi duahia diba.
5 Ita ibounai, sikuli memero kekeni danu, ese inai Bible siri tamona kiki herevadia ita gwauraia be auka lasi. Magasin oi hariharilaidia neganai namona be unai kiki herevana ta oi herevalaia toho. Laloaboio lasi, ita ura ruma taudia edia kamonai karana ita tahua guna, bena murinai magasin eiava buka ita henidia toho. Bible siri tamona ia gwauraia kiki herevana ta ita gaukaralaia be dala namona, badina unai amo do ita diba ruma taudia idia ura momokani idia kamonai eiava lasi, ani? Ai laloa April bona May lalodiai magasin eiava hua ena henia gauna umui hariharilaidia neganai, umui momo ese unai siri tamona kiki herevadia do umui gaukaralaidia dainai do umui moale.
6 Oi lao haroro neganai, bema sekeni 30 ginigunadia lalonai oiemu kara toana ia namo bona hamatamaia hereva namona oi gaukaralaia, reana oi ese ruma tauna ena lalona oi veria diba bona sivarai do ia ura kamonai henia.
This article is unique to PNG.