Iseda Hamatamaia Herevadia be Mai Anina Bada
1 Reasoning buka dekenai eiava Iseda Basileia Gaukara pepadia dekenai idia torea hamatamaia herevadia haida oi gaukaralaidia toho vadaeni, a? Pablisa taudia momo idia gwau unai idia torea hamatamaia herevadia hegeregerena, ruma ta ruma ta ai idia gwauraidia dainai, edia gaukara ia hanamoa. Ma haida idia gwau haroro totona idia hegaegae namonamo guna neganai, unai idia torea hamatamaia herevadia hegeregerena idia gwauraia lasi, to unai hereva edia anina be sibodia edia hereva amo idia gwauraia diba.
2 To, momokani gauna be inai, bema hamatamaia herevadia oi hegaegaelaia namonamo guna, mai moale danu Basileia ena sivarai do oi gwauraia namonamo diba. Oiemu vaira toana ese do ia hahedinaraia oi ura momokani idia dekenai sivarai namona oi gwauraia. Oi hegaegae namonamo guna dainai, oiemu hesiai gaukara do oi moalelaia bada badina anina do oi davaria. Gau badana be iseda boubou hesiai gaukarana do ia namo momokani.—Heb. 13:15; 1 Pet. 2:5.
3 Unai dainai nega oi atoa oi hegaegae namonamo totona. Oiemu teritori lalonai do oi davaria taudia oi lalodia. Idia lalohisihisilaia gaudia be dahaka? Dahaka kara idia vara dainai idia hekwarahi? Unai henanadai oi lalohadailaidia namonamo murinai, namona be Reasoning buka ena rau 9-15 amo eiava Iseda Basileia Gaukara pepana amo hamatamaia herevana ta o rua oi abia hidi. Bema oi ura, unai heduru hereva oi haidaua diba oi sibona emu hereva dekena amo do oi gwauraia namonamo diba totona. Murinai, pablisa haida danu unai hamatamaia hereva gwauraia dalana umui karaia toho. Unai ese ma pablisa taudia haida do ia hagoadaia edia hamatamaia herevana idia hanamoa totona. Bona unai neganai, umui hagoadaia heheni bona umui heduru heheni kara namodia umui karaia totona.
4 Haroro gaukara hegaegaelaia totona oiemu nega bona goada oi henia neganai, hahenamo do oi davaria. Reana, hari inai negai, oi abia hahenamo be do idia momo bena taunimanima haboua moale gaukarana dekenai oiemu nega oi habadaia diba.