Buruka Taudia ese Haroro Gaukara Idia Hadokoa Lasi
1 Taunimanima be idia buruka idia lao neganai, momo idia laloa moni gaukara amo do idia ritaea bona hekwarahi lasi maurina do idia moalelaia edia mauri lagani oredia lalonai. Haida idia laloa idia gaukara goada vadaeni dainai, hari idia laga-ani be namo. Eiava idia ura edia mauri dinadia oredia idia moalelaia sibona.—Luka 12:19.
2 To ita, Iehova ena gwauhamata hesiai taudia, ese gau idauna ita laloa iseda mauri lalonai. Ita diba Dirava ena hesiai gaukara amo ita ritaea lasi. Iseda laloa dalana be namo, badina ita ese “mauri hanaihanai” ita laloa noho. (Iuda 21) Lagani momo lalodiai diba bada abia karana ese ta ia durua unai diba ena anina lalo-pararalaia bona ena aonega ia hanamoa totona. Unai ese ta ia durua ena aonega, ia laloa namonamo karana, bona ena mauri laloa bada karana do ia habadaia totona. Unai kara ibounai ese sivarai namona ia harorolaia hesiai tauna idia durua.
3 Ta ia buruka ia lao ena anina be tauanina dalanai ia buruka ia lao sibona lasi; ena lalohadai be gau badana danu. Bema oi laloa nega daudau do oi mauri bona oi hekwarahi emu laloa dalana be eregabe taudia edia hegeregerena, sedira do oi noho sisina daudau. Buruka taudia ese edia noho idia hanamoa diba bema lauma dalanai edia diba idia habadaia bona ma haida dekenai unai diba idia henia.—1 Kor. 9:23.
4 Haheitalai Korikoridia: Ena mauri lagani be 86 neganai, taihu ta ia gwau: “Lagani 60 gunanai hereva momokani lau abia dae bona unai nega lau laloa lou neganai, Dirava ena helaro namona ese egu kudouna ia hahonua. Oibe, Iehova ese ia idia badinaia taudia ia badinaia dainai, moale bada herea do ita davaria.” (Sal. 18:25) Buruka tadikaka ta ese ena adavana ena mase ia laloa lou neganai, ia laloatao ena mase be hoa gauna ia dekenai, bona unai murinai ena tauanina ia manoka ia lao. Ia gwau: “To, Iehova ena hebogahisi karana dainai, lagani rua murinai lau hegeregere painia gaukara hamatamaia totona. Iehova lau tanikiu henia bada, badina haroro gaukara lau habadaia dainai egu gorere ia durua!”
5 Buruka taudia momo ai hanamoa badina edia lalona idia hadaia edia goada hegeregerena haroro gaukara do idia karaia noho—do idia hadokoa lasi! Mai edia badina namona dainai idia gwau: “Dirava e, lau be mero negana dekena amo, oi ese lau oi hadibaia vadaeni, bona unai negana ia mai bona hari, lau ese oiemu hoa karadia lau gwauraia vadaeni, bona do lau gwauraia noho.”—Sal. 71:17.