“Milenium Matamatana—Vaira Negana Ena Anina Oi Dekenai be Dahaka?”
1 Tanobada hegegemadai lalonai taunimanima momo ese unai henanadai idia laloa. Idia ore lagani handred momo lalonai taunimanima ese gau momo idia karaia vadaeni, to taunimanima idia badu badina lagani tausen momo lalonai idia ia hahisia hekwakwanai badadia momo be idia do noho. (Iobu 14:1; Sal. 90:10) Taunimanima be edeseni amo heduru do idia davaria diba?
2 October bona November lalonai, dala namona do ia kehoa, iseda dekena taudia dekenai unai henanadai ena haere do ita henia totona. Edena bamona? Basileia Sivaraina Namba 36 ita hariharilaia amo. Ena hereva kwarana be “Milenium Matamatana—Vaira Negana Ena Anina Oi Dekenai be Dahaka?” October hua ena kahana ginigunana lalonai, Gima Kohorona bona Awake! magasin do ita hariharilaia. Bena Monday, October 16, amo ela bona Friday, November 17 ai, ita ese Basileia Sivaraina Namba 36 hariharilaia gaukarana badana do ita karaia. Unai gaukara badana ita karaia neganai, Basileia Sivaraina Namba 36 be Monday ia lao Friday dekenai do ita hariharilaia. Saturday bona Sunday lalonai, Basileia Sivaraina Namba 36 be magasin matamatadia danu do ita hariharilaia.
3 Unai Gaukara Do Oi Goadalaia, A? Elda taudia, hesiai taudia, bona painia taudia ese unai gaukara do idia hakaua, badina unai gaukara ena vaira kahana dekenai idia noho. Pablisa momo ese edia noho dalana idia haidaua bona unai hariharilaia gaukara ena hua tamona eiava rua lalonai heduru painia gaukara idia karaia diba. Haida be palani idia karaia edia haroro negana do idia habadaia totona.
4 Kongregesen Buka Stadi naria taudia ese edia grup taudia ta ta ibounai do idia hagoadaia Basileia Sivaraina Namba 36 hariharilaia gaukarana idia goadalaia totona. Reana pablisa haida be haroro gaukarana idia karaia noho lasi. Namona be elda taudia ese unai taudia idia vadivadi henia, do idia itaia dahaka idia karaia idia durua totona. Reana dala idia karaia diba unai hua lalonai idia manada pablisa taudia ese manoka pablisa ta ta be haroro gaukara dekenai idia bamoa. Basileia Sivaraina Namba 36 ena auka lasi kiki herevana ese unai pablisa taudia ia hagoadaia lou diba.
5 Kahirakahira Diba bukana idia haorea bona idia do bapatiso lasi to pablisa ai idia lao diba Baibel stiuden taudia totona, unai be haroro gaukara hamatamaia negana namona. Matamata taudia danu be unai gaukara namona idia karaia diba.
6 Auka lasi kiki herevana oi gaukaralaia diba. Reana oi gwau:
◼ “Egu nega lau henia inai mai anina bada sivaraina be [taoni eiava hanua ena ladana oi gwauraia] ai idia noho ruma bese ibounai dekenai lau mailaia totona. Inai be oiemu pepa ta. Mani emu kara oi duahia.” Basileia Sivaraina Namba 36 oi hariharilaia neganai, reana emu haroro baege oi abia lao lasi be namo.
7 Haroro Heboudia Hegaegaelaia Namonamo: Namona be elda taudia ese haroro hebou namodia idia karaia nega namodia ai. Namona be haroro naria tauna ese ruma-ta-ruma-ta bona bisinesi teritori momo ia hegaegaelaia guna, unai amo ibounai ese unai gaukara idia goadalaia diba. Bema dala ia noho, namona be haroro hebou be pura ena dina ta ta ai bona Saturday bona Sunday ai idia hegaegaelaia. Sikuli taudia, moni gaukara idia karaia tadikakadia, bona ma haida edia namo totona, adorahi kahanai haroro hebou umui karaia diba.
8 Taunimanima Idia Noho Lasi Rumadia: Iseda tahua gauna be ruma taudia momo herea ita hereva henia. Bema oi vadivadi negana ai ta be ruma dekenai ia noho lasi, iena adres oi torea bona dina ena nega idauna ta ai oi giroa lou. Bema unai pepa hariharilaia gaukarana ena pura dokonai unai ruma taudia oi do davaria lasi, Basileia Sivaraina Namba 36 pepana ta be idia raka lao taudia idia itaia lasi gabuna ta dekenai oi rakatania diba. Reana kongregesen elda taudia ese kongregesen idia hadibaia, do idia giroa lou diba lasi gabudia ai eiava teritori ia bada dainai unai hua rua lalonai do idia haorea diba lasi gabudia ai, vadivadi ginigunana dekenai taunimanima idia noho lasi rumadia dekenai Basileia Sivaraina Namba 36 pepana ta idia rakatania be namo.
9 Ita Karaia Goadagoada! Ela bona unai gaukara ia ore November 17 ai, namona be kongregesen idia hekwarahi edia teritori ibounai idia karaia totona. Bema emui teritori be bada, pablisa haida be reana sibodia idia gaukara diba bema unai be namo bona gabu be ia dika lasi. Unai dala amo kara namo taudia momo dekenai sivarai namona do ita harorolaia diba. Namona be kamonai taudia edia adres oi torea namonamo bona dogoatao.
10 Kongregesen iboudiai be Basileia Sivaraina Namba 36 do idia oda lasi, badina idia ta ta dekenai do ai siaia. Oi hegaegae vadaeni bona oi ura bada inai gaukara namona do oi karaia goadagoada, a? Dirava ese vaira negana totona ia gwauhamatalaia gaudia be iseda dekena taudia ibounai dekenai ita hadibaia be hahenamo badana!