Tiokratik Haroro Sikuli Ena Henanadai

Tiokratik Haroro Sikuli ena henanadai January 7 ia lao April 22, 2002, edia wiki herevadia dekenai. Henanadai negana lalonai henanadai edia haere be ma pepa ta dekenai oi torea.

[Itaia: Henanadai negana lalonai, Baibel sibona oi gaukaralaia haere oi tahua totona. Henanadai murinai ai torea stadi gaudia be oi sibona emu stadi karaia totona. Gima Kohorona edia amo ai abia hereva haida edia rau bona paragraf namba ai torea lasi.]

Henuna hereva oi gwauraia Momokani eiava Koikoi:

1. Hadibaia Tauna 2:2 dekenai, Solomona ena hereva ena anina be namona be ita kiri lasi bona ita moale lasi. [1, Wiki ta ta ena Baibel duahiduahi; w87-E 9/15 rau 24 par. 5 itaia.] Koikoi. Solomona ia hahedinaraia moale karadia amo moale korikori ita tahua be “kavakava” badina unai be anina lasi; unai hegeregerena, “moale” sibona ese mauri ena hekwakwanai ia hanamoa lasi.

2. Hadibaia Tauna bukana be lalo-metau herevadia bukana lasi, to ia lalonai Dirava ena amo idia mai aonega herevadia idia noho bona ia gwau gaukara dikadia be Dirava dadaraia karadia. [2, bsi02-1 Hadibaia Tauna par. 15] Momokani.

3. Isaia 1:7 ai, peroveta tauna be Ahasa ena lohia negana ai Iuda idia hadikaia ore karana ia gwauraia. [4, Wiki ta ta ena Baibel duahiduahi; ip-1-E rau 17 par. 16 itaia.] Koikoi. Isaia ese unai hereva ia henia neganai, reana Baibel ena kahana ma ta ai ia noho karaia dalana ia gaukaralaia​​—unai be vaira negana ai do ia vara karana ta ia herevalaia neganai, ia vara vadaeni dalanai ia gwauraia, unai ese ia hahedinaraia peroveta herevana be do ia guguru momokani.

4. Apokalupo 7:9 dekenai, inai hereva “helai gabuna badana ena vairanai bona Mamoe ena Natuna ena vairanai idia gini” ena anina be edia gini gabuna be guba. [6, rs rau 152 par. 4] Koikoi. Inai hereva “helai gabuna badana ena vairanai” ena anina be “helai gabuna badana amo ia itaia diba gabuna.” Ia hahedinaraia Dirava be hutuma bada herea ia lalo-namo henia; to ia hahedinaraia lasi edia gini gabuna be guba.

5. Iseda gau namodia​​—iseda nega, diba, goada, bona kohu—be Iehova hanamoa totona ita gaukaralaia dainai, Iehova amo hahenamo momo ita abia. (Aon. 3:​9, 10) [7, w00 1/15 rau 25 par. 1] Momokani.

6. Isaia 28:21 ia perovetalaia ‘gaukara idauna’ ena anina hari inai negai be Aramagedono lalonai Dirava ese tanobada besedia do ia hadikaia ore. [8, Wiki ta ta ena Baibel duahiduahi; ip-1-E rau 295 par. 16; rau 301 par. 28 itaia.] Koikoi. Ia be Kerisendom, sibona ia gwauraia Dirava ia hesiai henia oreana, ena hadikaia ore karana ia gwauraia.

7. Mataio 24:​38, 39 ese ia hahedinaraia hegeregerena, Noa ena negai idia noho taudia be aniani bona inuinu gaudia, bona taunimanima edia kara idauidau ma haida danu, idia moalelaia bada dainai, Abata ese ia hamasedia ore. [11, w00 2/15 rau 6 par. 7] Koikoi. Unai siri ia gwauraia gaudia ta be kerere lasi; taunimanima ese unai “vaia” idia noholaia mauri dalana hegeregerena idia noho bona Noa ena sisiba “idia laloa lasi.”

8. Nega ibounai Iehova ese ena manau hesiai taudia, sibona edia ura idia dadaraia taudia unai, edia noinoi gaudia ia henia. [12, w00 3/1 rau 4 par. 3] Koikoi. Ena be Iehova Dirava ese mai edia manau ida ena hesiai gaukara idia karaia taudia edia guriguri ia kamonai, to nega ibounai ia ese edia noinoi gaudia ia henia lasi. Ia be vaira ai do idia vara gaudia ia diba dainai, hanaihanai ia ese iseda namo ia laloa, bona iena ura hegeregerena ia kara.

9. Isaia 60:3 ese ia gwauraia “bese idauidau” be Dirava ia henia diarina idia itaia politikol oreadia ta ta. [14, Wiki ta ta ena Baibel duahiduahi; w00 1/1 rau 12 par. 4 itaia.] Koikoi. Unai be bese idauidau amo idia mai hutuma bada herea taudia ia gwauraia, idia be tanobada helarona idia abia bona Iehova ese idia do ia hadibaia totona ia dekenai idia lao. (Apok. 7:9)

10. Ieremia ia do vara lasi neganai Iehova ese ia “hahelagaia,” bona ena anina be Ia ese Ieremia ena vaira negana ia gwauraia hidi vadaeni. (Ier. 1:5) [15, Wiki ta ta ena Baibel duahiduahi; w88 11/1 rau 10 par. 2 itaia.] Koikoi. Iehova ese Ieremia ia “hahelagaia” ena anina be Ia ese Ieremia ia abia hidi gaukara hereana ta, peroveta gaukarana unai, do ia karaia.

Henuna henanadai oi haerelaidia:

11. Isaia 6:8 dekenai, Iehova ese “ai” ia gwauraia neganai, daidia ia herevalaia? [4, Wiki ta ta ena Baibel duahiduahi; ip-1-E rau 93-4 par. 13 itaia.] Inai hereva “ai” ese Iehova bona ia sibona ia havaraia Natuna tamona, Iesu Keriso ai ia lao tauna, ia herevalaia; unai ese ia hahedinaraia unai matahanai lalonai Iehova be ia sibona ia havaraia Natuna ida ia noho guba dekenai. (Ioa. 1:​14; 12:41)

12. Isaia 9:2 ia guguru neganai, edena dala ai “diari badana” be Galilea dekenai ia diari? [5, Wiki ta ta ena Baibel duahiduahi; ip-1-E rau 126 par. 17 itaia.] Iesu ena gaukara tanobada dekenai bona ena boubou gauna ese ia havaraia hahenamo be “diari badana”; Mesia ia hedinarai neganai, manau taudia momo edia matana be dala namo hereana ai ia kehoa. (Ioa. 1:​9, 12) (Unai bamona hereva ia hegeregere)

13. Lagani 539 B.C.E. ai, Babulonia ia moru bona gabeai idia hadikaia momokani, to hari inai negai dahaka kara be unai hegeregerena? (Isa. 13:​19, 20; 14:​22, 23) [6, Wiki ta ta ena Baibel duahiduahi; ip-1-E rau 188 par. 30-1 itaia.] Lagani 1919 ai, Babulonia Badana ia moru, Dirava ena taunimanima do ia biagua lou lasi; kahirakahira tanobada ena tomadiho koikoi ibounai do ia ore momokani.

14. Edena dala ai “hesiai tauna mai ena kamonai, bona mai ena kara maoromaoro” be Isaia 21:6 ese ia gwauraia “gima tauna”? (Mat. 24:45) [7, Wiki ta ta ena Baibel duahiduahi; ip-1-E rau 221-2 par. 11 itaia.] “Hesiai tauna mai ena kamonai, bona mai ena kara maoromaoro” be ia gima noho, bona ia itaia Dirava ena hahemaoro dinana be kahirakahira dainai ia herevalaia.

15. Aonega Herevadia 31:10 ai, adavana ia tahua tau matamatana ese dahaka aonega sisiba ia davaria? [10, w00 2/1 rau 31 par. 1] “Hahine namona” davaria be mai ena hekwarahi, unai dainai dava bada gauna tahua karana bamona, tau matamata ese nega ia atoa bona ia abia hidi namonamo be namo, unai amo ia ese ia davaria hahine namona do ia laloa bada.

16. Isaia 43:9 dekenai, tanobada besedia edia dirava idia boiridia dahaka do idia karaia toho totona? [11, Wiki ta ta ena Baibel duahiduahi; w88 9/1 rau 16 par. 3 itaia.] Iehova ese tanobada besedia edia dirava ia boiridia do idia hahedinaraia idia be dirava korikoridia, peroveta herevadia gwauraia amo bona edia witnes taudia do idia hamomokania edia dirava idia abidadama henidia be mai ena badina korikorina bona idia tomadiho henidia be maoro.

17. Dahaka ita karaia be namo sibona eda kudouna ita koia lasi totona? (Ier. 17:9) [13, w00 3/1 rau 30 par. 4] Namona be ita koikoi lasi, iseda kerere dainai ekskius herevadia ita gwauraia toho lasi; danu, namona be mai eda ura bada ida iseda kudouna ita hegaegaelaia Iehova amo hagoevaia bona tohoa karana do ita abia dae totona, ena be unai kara ena anina be ita abia dae ita be mai eda kerere badadia bona do ita hanaia be namo. (Sal. 26:2)

18. ‘Iehova ena oda hegeregerena idia noho’ taudia ese dahaka idia karaia be namo? (Ier. 7:​23) [16, Wiki ta ta ena Baibel duahiduahi; w99 8/15 rau 29 par. 6 itaia.] Namona be edia lalona idia hadaia Iehova sibona do idia tomadiho henia, Iehova ena gwauhamata iboudiai do idia abidadama henia bona iena taravatu hereadaedia do idia badinaia. (Sal. 11:7)

Henuna herevadia dekenai idia torea lasi herevadia oi torea:

19. Solomona ena Ane ese ia hadibaia gauna namona ta be Dirava ena hakaua herevadia badinaia karana. [3, bsi02-1 Solomona ena Ane par. 16]

20. Isaia 33:1 ia gwauraia Iuda hanuadia edia kohu idia henaoa taudia be Asuria taudia, bona lagani 632 B.C.E. ai do ia moru, bona ena kohu bada herea do ia rakatania bona Iuda taudia ese do idia abia. (Isa. 33:​4) [9, Wiki ta ta ena Baibel duahiduahi; ip-1-E rau 343 par. 4; rau 345 par. 6 itaia.]

21. Isaia 54:1 be Galatia 4:​26, 27 ida ita hahegeregerea neganai, ia hahedinaraia “natuna ia havaraia diba lasi hahine” be “guba dekenai ia noho Ierusalema” ia laulaulaia; bona “iena tau ese ia rakatania lasi hahine” be Israela besena ia laulaulaia. [13, Wiki ta ta ena Baibel duahiduahi; w95 8/1 rau 11 par. 8 itaia.]

22. Iseda haroro gaukara lalonai taunimanima ese ita idia kirikirilaia bona dadaraia neganai, namona be ita laloatao unai bamona dagedage karadia be ita dekenai idia hahedinaraia lasi, to Iehova, ita gwauraia herevana ia halasia Tauna, dekenai idia hahedinaraia. (2 Kor. 4:​1, 7) [6, w00 1/15 rau 21 par. 2]

Henuna herevadia dekenai haere maorona oi abia hidi:

23. Paulo ese ena matahanai lalonai Iesu mai ena guba hairai ida ia itaia bona ena sivarai ia torea neganai, sibona ia gwauraia “mero ta ia vara dika bamona,” anina be (lauma helaga amo ia vara lou; Iuda lasi taudia totona aposetolo gaukara ia karaia dagina ia abia; toana be lauma maurina ai ia vara bamona, eiava ia toreisi lou, ena be unai toreisi lou korikorina be gabeai do ia vara). (1 Kor. 9:1; 15:8) [8, w00 1/15 rau 29 par. 6]

24. Inai dagi ladana “Hanaihanai Noho Tamana” ese Mesia Pavapavana ena goada bona siahu ia gwauraia, unai gaudia dainai (lauma dalana ai goada; guba dekenai mase diba lasi maurina; tanobada dekenai mauri hanaihanai abia helarona) be taunimanima dekenai ia henia diba. (Isa. 9:6; Ioa. 11:​25, 26) [5, Wiki ta ta ena Baibel duahiduahi; ip-1-E rau 131 par. 26 itaia.]

25. Hari inai negai, Isaia 66:7 ena hereva ia guguru lalonai, ia vara “natuna” ese (Iesu Keriso; Mesia Basileiana; lagani 1919 ai ia vara lauma besena matamatana) ia laulaulaia. [14, Wiki ta ta ena Baibel duahiduahi; w95 1/1 rau 11 par. 3 itaia.]

26. Mataio 10:28 ita duahia namonamo neganai, ita itaia diba Gehena lahina be (hisihisi ania hanaihanai gabuna; mase hanaihanai ia laulaulaia; Dirava amo siri karana ia laulaulaia). [9, rs rau 181 par. 3]

27. Hari inai negai, Ieremia 7:​28 ia guguru lalonai, ia gwauraia ‘bese taudia, Lohiabada Dirava idia kamonai henia lasi’ besena unai, be (Babulonia Badana; Kerisendom; tanobada ena basileia badana namba 7). [16, Wiki ta ta ena Baibel duahiduahi; w88 11/1 rau 20 par. 10 itaia.]

Henuna herevadia dekenai siri maorona oi abia hidi:

Aon. 24:16; Had. 3:​11; Isa. 40:8; Roma 10:15; 1 Pet. 4:6

28. Nega korikori ai, Dirava ia karaia gaukarana ta ta edia gabu korikorina iena ura lalonai do ia hahedinaraia. [Had. 3:​11] [1, Wiki ta ta ena Baibel duahiduahi; w87-E 9/15 rau 24 par. 8 itaia.]

29. Lauma dalanai idia mase taudia dekenai sivarai namona ita harorolaia neganai, unai ese dala ia kehoa idia helalo-kerehai totona. [1 Pet. 4:6] [3, rs rau 148 par. 2]

30. Ena be iseda mauri lalonai hekwakwanai idia vara dainai nega haida do ita moru, to Dirava badinaia taudia be edia kara namo idia rakatania lasi. [Aon. 24:16] [9, w00 2/1 rau 4 par. 4]

31. Gau ta ese Dirava ena Hereva, eiava ia gwauraia urana, ena hagugurua dalana do ia haidaua lasi eiava do ia koua lasi. [Isa. 40:8] [10, Wiki ta ta ena Baibel duahiduahi; ip-1-E rau 401-2 par. 10 itaia.]

32. Iesu ena aposetolo taudia ese Isaia ena peroveta herevana idia gaukaralaia namonamo bona idia hahedinaraia idia be haroro gaukara dekenai idia guguru. [Roma 10:15] [14, bsi02-1 Isaia par. 37]