Europe Ena Tano Haida Dekenai Intenesenel Kingdom Hall Haginia Gaukarana Idia Karaia
1 Vanegai lagani ten haida lalonai, Europe ena tano momo bona Eastern Europe dekenai danu, Iehova ena Witnes taudia edia gaukara idia koua. Nega momo, taravatu aukadia idia atoa. Taunimanima edia vairanai hebou idia karaia be auka, bona Kingdom Hall ai idia hebou be auka herea. To, vanegai laganidia lalonai, “Ia ese kara badadia momokani ita totona ia karaia. Unai dainai ita be mai moale bada danu.”—Sal. 126:3.
2 Lagani 1983 amo ia matamaia, Iehova ena Witnes taudia idia koua karana be ia maragi ia lao. Lagani 1989 ai, Poland bona Hungary dekenai Iehova ena Witnes taudia dekenai gwau-maoro idia henia. Lagani 1991 ai, Russia dekenai Iehova ena Witnes taudia edia orea idia rejista. Unai nega amo, Russia bona guna idia gwauraia Soviet Union ripablik tanodia dekenai gaukara ia bada ia lao. March 1996 bona October 1998 huanai, Hakaua Oreana ese Europe tanodia 11 idia naria brens opesi edia noinoi Kingdom Hall 359 ena abitorehai monina totona gwaumaoro ia henia.
3 Udaia pepana lalonai idia noho laulau oi itaia neganai, Iehova ese ia karaia vadaeni hoa karadia badadia iena taunimanima totona oi lalohadailaia. (Sal. 136:4) Ita diba tanobada ibounai tadikaka oreana ese idia henia kontribusen be dala namo hereana dekenai idia gaukaralaia dainai ita moale bada, unai ese Iesu ena hereva ia hahedinaraia, Ioane 13:35 dekenai, ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”
4 Kingdom Hall haginia gaukarana totona heduru idia abia Europe tanodia amo Romania be ta, July 2000 amo unai tano dekenai Kingdom Hall ibounai 36 idia haginia vadaeni. Ukraine dekenai, edia Kingdom Hall ibounai totona palani tamona idia gaukaralaia dainai, lagani 2001 ai 61 idia haginia, bona lagani 2002 ai 76 ma haida idia haginia. Kingdom Hall Fund totona idia henia kontribusen monina ida, Bulgaria, Croatia, Macedonia, Moldova, Russia, bona Serbia bona Montenegro dekenai Kingdom Hall handred momo idia haginia vadaeni.
5 Tano haida dekenai, Kingdom Hall haginia totona be ia auka, bona idia hekwarahi bada murinai konstraksen gaukarana idia hamatamaia diba. Nega momo konstraksen gaukara totona idia hegaegae lalonai nega bada idia haorea. Danu, Europe dekenai Kingdom Hall haginia ena davana be bada herea, Africa eiava South America ena tano haida ia hanaia. To, Iehova idia tomadiho henia taudia edia namba ia bada daekau dainai, kohu momo lasi Europe tanodia dekenai Kingdom Hall handred momo idia haginia be namo!
6 Unai Kingdom Hall idia haginia gaukarana ia bada ia lao haraga ita itaia neganai ita moale bada! Ekspiriens momo ese idia hahedinaraia bamona, Kingdom Hall idia haginia gabudia kahirakahira idia noho taudia dekenai haroro namona ia henia. Gabu haida dekenai, gavamani taudia be idia hoa badina tadikaka ese haginia gaukarana ena hakaua herevadia be mai edia ura ida idia badinaia.
7 Isaia ese hari inai negai tomadiho momokani do ia bada ia lao ia perovetalaia. Dirava be unai peroveta tauna amo ia gwau: “Negana korikori ia ginidae neganai, lau ese inai kara do lau havaraia haraga. Lau inai Lohiabada!” (Isa. 60:22) Momokani, idia hanaia lagani 10 ese ia hamomokania, Eastern Europe dekenai Iehova ese unai gaukara ia habadaia. Kingdom Hall Fund ita durua neganai, tano momo dekenai Kingdom Hall haginia gaukarana totona Iehova ese iseda hekwarahi ia hanamoa bada noho! Unai amo kohu momo lasi tanodia dekenai Kingdom Hall ma haida do idia haginidia. Europe ena kahana momo dekenai tomadiho goevadaena do ia bada ia lao bona dala badana ai “tanobada taudia ibounai dekenai” haroro namona ia henia.—Kara 13:47.
[Pictures on page 3]
Kingdom Hall Rumadia Moscow, Russia
[Pictures on page 4-6]
Eastern Europe Dekenai Kingdom Hall Matamatadia
Strumica, Macedonia
Daruvar, Croatia
Bitola, Macedonia
Sokal, Lviv Distrik, Ukraine
Mladost, Bulgaria
Krasnooktyabrskiy, Maykop Kahana, Russia
Bački Petrovac, Serbia bona Montenegro
Plovdiv, Bulgaria
Tlumach, Ivano-Frankivsk Distrik, Ukraine
Rava-Ruska, Lviv Distrik, Ukraine
Stara Pazova, Serbia bona Montenegro
Zenica, Bosnia bona Herzegovina
Sokal, Lviv Distrik, Ukraine
Zhydachiv, Lviv Distrik, Ukraine