Tiokratik Haroro Sikuli Ena Riviu
Inai henanadai be Tiokratik Haroro Sikuli dekenai do ita herevalaia, June 28, 2004 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be May 3 ia lao June 28, 2003 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.—Haroro Sikuli bukana, rau 36-7 itaia.]
HEREVA KARANA
1. Platfom amo ita hereva neganai, dahaka gaudia dainai iseda hereva ena toana be herevahereva bamona lasi? [1, be rau 179 par. 4] Nega momo idia torea herevana bona ita gwauraia hereva be idau, bema iseda hereva lalonai lalohadai ta be idia printaia hegeregerena ita gwauraia eiava idia printaia autlain amo ita duahia, iseda hereva ena toana be ita herevahereva bamona lasi. Danu sentens aukadia ita gaukaralaia karana ese hereva ena mamina do ia hahedinaraia lasi. Herevahereva dalanai ita hereva diba bema lalohadai be sibona iseda hereva amo ita gwauraia.
2. Dahaka dainai iseda gado regena hanamoa dalana be hahodi namonamo eiava masolo oi hamanokaia karana sibona amo ia vara lasi? [2, be rau 181 par. 2] Gado regena namona dekenai iseda kara be mai anina bada danu. Ma haida edia namo ita laloa momokani neganai, iseda gado regena ese unai ia hahedinaraia.
3. Ma haida ida Baibel ena hereva momokani ita herevalaia neganai, edena dala namona haida ai ‘taunimanima idauidau ibounai edia mauri dalana ita abia dae’ diba? (1 Kor. 9:20-23) [5, be rau 186 par. 2-4] Ita hekwarahi ma haida ita itaia namonamo totona. Ita itaia gaudia amo gau haida ita dibaia, unai ese ita do ia durua ma haida laloa bada karana ita hahedinaraia totona. Reana ruma tauna ena gaukara do ita diba. Reana laulau eiava toretore haida idia noho, unai ese ena tomadiho ena abidadama ia hahedinaraia. Iseda teritori dekenai idia noho taudia dekenai, mai anina bada Baibel ena hereva haida ita herevalaia neganai, ita hahedinaraia edia lalohadai bona edia mauri ita laloa bada.
4. Iseda haroro gaukara lalonai ita kamonai namonamo totona, dahaka ita karaia be namo? [6, be rau 187] (1) Ma haida ita hagoadaia edia lalohadai idia gwauraia totona, bena nega ita henia idia haere totona. (2) Idia hereva neganai ita kamonai namonamo. (3) Edia lalohadai idia gwauraia dainai idia ita tanikiu henia. (4) Dala namona ai henanadai ita henia noho, edia lalohadai ita diba goevagoeva totona. (5) Ita hegaegae namonamo neganai, ita harorolaia sivaraina be ita diba namonamo, unai ese lalo-maino ia henia bona ma haida edia hereva ita kamonai namonamo.
5. Dahaka dainai iseda haroro gaukara ai ita davaria taudia ibounai dekenai hemataurai ita hahedinaraia be gau badana? [9, be rau 190] Ita davaria taudia ibounai be “Dirava ese iena toana bamona ia karaia.” (Iam. 3:9) Keriso be idia ta ta totona ia mase bona namona be sivarai namona idia kamonai, unai amo idia badinaia bona hahemauri idia abia.
HEREVA NAMBA 1
6. Tiokratik dalanai diba idia henia taudia edia tahua gauna be dahaka, bona dahaka ese ita do ia durua unai tahua gauna ita abia totona? (Mat. 5:16; Ioa. 7:16-18) [1, be rau 56 par. 3–rau 57 par. 2] Ma haida ita hadibaia ena badina be Iehova ita hanamoa totona. Namona be ita naria namonamo, gau ta ese unai tahua gauna do ia koua lasi. Unai dainai, iseda hereva bona hereva dalana ita palanilaia neganai, namona be ita sibona ita nanadaia, ‘Inai ese Iehova laloa bada karana ia habadaia, eiava lau ia abia isi?’
7. Dahaka dainai ita hadibaia neganai, gau idauidau edia idau hahedinaraia karana ese namo ia havaraia, bona Iesu ese unai hadibaia dalana be edena bamona ia badinaia? [2, be rau 57 par. 3; rau 58 par. 2] Gau idauidau edia idau hahedinaraia karana ese ma haida ia durua hereva momokani bona tomadiho ma haida edia idau idia itaia totona. Iesu ese taunimanima edia lalohadai Mose ena Taravatu dekenai bona Taravatu ena anina korikori, Dirava badinaia karana korikorina bona Farisea taudia edia koikoi karadia, sibona abia isi bona sibona edia ura tahua guna lasi karana, bona ta sibona ena maoro ia gwauraia toho karana bona helalo-kerehai momokani edia idau ia hahedinaraia. (Mat. 5:21-48; 6:1-18; 20:25-28; 21:28-32)
8. Edena dala ai Iesu ena hadibaia karana ese taunimanima edia kudouna ia hamarerea, bona unai be Farisea taudia edia hadibaia karana amo ia idau? [3, be rau 59 par. 2-3] Iesu ese taunimanima ia hadibaia Dirava idia lalokau henia dainai, Ia idia badinaia. (Mat. 15:8) Iesu ese taunimanima ia hagoadaia kara ta idia karaia ena badina idia tahua totona. (Mar. 2:8) To, Farisea taudia be mai anina bada gaudia idia dadaraia bona idia ese Taravatu ena kahana maragimaragi bona sibona idia karaia taravatu badinaia karana idia laloa bada, unai amo edia helaga karadia be toana sibona amo idia hahedinaraia. (Luka 11:42)
9. Ita hadibaia taudia be edena bamona ita durua diba idia dibaia gaudia idia badinaia totona, unai amo idia sibodia ese abia hidi do idia karaia? [4, be rau 60 par. 1-3] Baibel ena hakaua herevana ta ita hadibaia neganai, mauri lalonai ia vara diba gauna ta ita gwauraia bena stiuden taudia ita nanadaia edena dala ai unai Baibel ena hakaua herevana ese idia do ia durua, bema unai bamona gauna be idia dekenai ia vara. Pentekoste ai Petero ia karaia bamona, Baibel ita herevalaia bona hahedinaraia namonamo neganai, nega momo kudou-maoro taudia ita hagoadaia kara maorona idia karaia totona. (Kara 2:37)
10. Ma haida be edia abia hidi gaudia totona ita idia nanadaia neganai, edena dala ai ita haere henia diba? [8, be rau 69 par. 4-5] Mai manau ida ita haere be namo. (Kol. 4:6) Reana ita diba dahaka do ita karaia, to namona be ita laloaboio lasi ta ta be ena mauri lalonai sibona ena abia hidi ia karaia. (Gal. 6:5) Unai dainai, ta be ita ia nanadaia, unai eiava inai ia vara neganai dahaka ita karaia be namo neganai, namona be Baibel ena hakaua herevadia bona haheitalai ita herevalaia, eiava ia henanadai tauna dekenai hereva tahua karana ita hadibaia, unai amo ‘maoro bona kerere edia toana do ia diba namonamo.’ (Heb. 5:14)
WIKI TA TA ENA BAIBEL DUAHIDUAHI
11. Dahaka dainai Mose ese Iehova amo ia abia palanina ia badinaia namonamo be namo “Palai Dubu, bona ena lalonai noho gaudia” ia karaia totona? (Eso. 25:9) [1, it-2-E rau 1058 par. 7] Unai palani be “guba ena dubu helaga ena toana” bamona, lauma dalanai ia noho gauna ia laulaulaia, unai dainai ena kahana ibounai be palani hegeregerena ia karaia be namo. (Heb. 8:5)
12. Hanaihanai gabua ore boubouna be kara dika boubouna eiava kerere davana karaia boubouna murinai idia karaia, unai ese dahaka ia hahedinaraia? (Lev. 8:14, 18; 9:2, 3) [3, w00 8/15 rau 16 par. 16, rau 19, par. 8] Ia hahedinaraia kara dika tauna ena boubou gauna be Dirava ese ia abia dae totona, ena kara dika be Iehova ese ia gwauatao guna be namo. Unai dainai, bema ita ura eda tomadiho karana be Dirava ese ia abia dae, namona be karaharaga ita ese Dirava ena taravatu utua karadia ita hamaoromaoroa. Namona be karaharaga Dirava ese ia henia heduru gaudia—“ekalesia gunalaia taudia” bona “iseda kara dika gwauatao dalana,” Iesu Keriso—ita abia dae. (Iam. 5:14; 1 Ioa. 2:1, 2)
13. Israela taudia be mai kamonai ida Iehova ena hahegani Esodo 34:23, 24 ai idia badinaia karana amo, dahaka ita dibaia? Israela tatau ibounai be lagani ta ai nega toi Ierusalema dekenai hebouhebou totona idia lao, unai ese edia abidadama Iehova ena gwauhamata dekenai ia tohoa. Iuda taudia be edia inai besedia ese idia gegea. Taunimanima edia laloa dalana ai, tatau ibounai be Ierusalema ena aria dekenai idia lao dainai, edia inai taudia ese edia tano do idia hadikaia diba. Hari inai negai danu, hebou maragidia bona badadia ita lao henia totona, Dirava ena gwauhamata dekenai iseda abidadama ia goada be namo, unai gwauhamata be bema Basileia ita atoa guna Dirava ese iseda tauanina ena ura gaudia do ia henia. (Mat. 6:33) [4, w98 9/1 rau 20; w67-E rau 436]
14. Dahaka dainai maino karaia boubouna idia karaia? (Lev. 3:1) Dirava ese ia lalo-namo henia taudia ese ia ida idia moalelaia mainona dainai, edia tanikiu eiava moale idia hahedinaraia. Hahelaga taudia bona boubou idia karaia taudia ese Iehova dekenai idia bouboulaia animal ena rara bona digara idia henia murinai ena hidio idia ania. Hairai bona laulau dalanai, boubou ia karaia tauna, hahelaga tauna bona Iehova Dirava ese aniani ta idia ania hebou, unai ese idia huanai ia noho mainona ia hahedinaraia. [6, w00 8/15 rau 15 par. 15]
15. Hari inai negai, ita karaia hesiai gaukara helagana dekenai, Esodo 9:30 amo dahaka ita dibaia? [7, w00 11/15 rau 14] Unai siri ese ia hahedinaraia idaunegai Israela ena nega lalonai, Iehova ena taravatu hegeregerena, hesiai gaukara helagana idia karaia. Hari inai negai danu, bema ita ura iseda hesiai gaukara helagana ia abia dae, taravatu haida ita badinaia be gau badana. Dirava tomadiho henia dalana maorona be ita ese ita abia hidi lasi. Diba maoromaoro Baibel dekenai, lauma dalanai lalo-parara ita abia, bona Dirava ena aonega ita abia be gau badana. (Kol. 1:9, 10)