Aneru ese Ita Idia Durua Noho
1 “Lau be hanaihanai umui danu ita noho ela bona tanobada dokona.” Unai hereva ese Iesu ena hahegani idia badinaia taudia ibounai ia hagoadaia: “Unai dainai do umui lao, bese ibounai be diba tahua taudia do umui halaoa.” (Mat. 28:18-20) Iesu be ena aneru amo Keristani taudia momokanidia ida ia noho be dala badana ta. (Mat. 13:36-43) Unai abidadama lauma taudia ida “noho hanaihanai Sivarai Namona” ita harorolaia be moale bada gauna!—Apok. 14:6, 7.
2 Iseda Hesiai Gaukara Ai: Baibel ese ia hahedinaraia, Dirava be aneru ia siaia “mauri do idia abia taudia durua totona.” (Heb. 1:14) Aposetolo edia negai, aneru ese Iesu ena murinai idia raka taudia be kara namo taudia dekenai idia hakaua. (Kara 8:26) Hari, Dirava ena hesiai taudia ese aneru edia hakaua dalana idia itaia noho. Nega momo, ruma taudia idia gwau idia be heduru totona idia guriguri noho neganai, Witnes taudia be edia ruma dekenai idia mai. Unai bamona taudia ese Basileia ena sivarai idia abia dae neganai, ita be aneru ida ita moale hebou!—Luka 15:10.
3 Dagedage Ita Davaria Neganai: Daniela, ena Heberu bamodia toi, aposetolo Petero, bona hahetoho badadia idia davaria taudia momo ese Iehova ena aneru mai edia “goada badana” amo ena heduru idia abia. (Sal. 103:20; Dan. 3:28; 6:21, 22; Kara 12:11) Herevana nega haida dagedage ita davaria neganai ita laloa ita hegeregere lasi, to Elisaia ena hesiai tauna ena sivarai ese ita ia hagoadaia diba, badina unai negai ia dibaia gauna be, “ita idia durua taudia be momo, to unai orea idia durua taudia be momo lasi.” (2 Kin. 6:15-17) Ena be iseda Keristani tadikaka amo ita do idia hapararaia, to namona be ita lalohisihisi lasi. Dirava ena Hereva ese ita ia hadibaia: “Lohiabada ena aneru ese, Dirava dekenai idia gari taudia ia naridia noho.”—Sal. 34:7.
4 Kahirakahira, aneru be tuari oreana ta bamona Keriso ena lohia siahuna idia dagedage henia taudia ibounai do idia kokia. (Apok. 19:11, 14, 15) Unai dina ita do naria noho lalonai, namona be mai gari lasi ida Iehova ita hanamoa noho, badina ita diba momokani Keriso ena hahegani hegeregerena, guba ena tuari oreana ese ita do idia durua bada.—1 Pet. 3:22.